AQShdagi Respublikachilar partiyasi senatorlari 27-iyul kuni koronavirus tarqalishi fonida Amerika iqtisodiyotini qo‘llab-quvvatlashga qaratilgan 1 trillion dollarlik yangi paket loyihasini taqdim etish niyatida. Bu haqda mamlakat moliya vaziri Stiven Mnuchinga tayanib, “RBK” xabar berdi.
Uning so‘zlariga ko‘ra, respublikachi-senatorlar tomonidan taklif etilgan tashabbus Oq uy tomonidan maksimal darajada qo‘llab-quvvatlangan. Hozirda loyihaning faqatgina texnik masalalari ishlab chiqilmoqda.
“Bir trillion dollarlik paket ichidan ustuvor va shoshilinch masalalar o‘rin olgan”, — deydi vazir. Mnuchinning ta’kidlashicha, oldinda Demokratlar partiyasidan bo‘lgan qonun chiqaruvchilar bilan hal etilishi kerak bo‘lgan muhokamali masalalar mavjud. Uning so‘zlariga ko‘ra, demokratlarning pozitsiyasi sabab ish haqi bo‘yicha soliqni kamaytirish taklifi loyihaga kiritilmasligi mumkin.
AQSh moliya vazirining qayd etishicha, paketdan Amerika oilalari uchun yangi to‘lovlar ham o‘rin olgan. Vazirning aniqlik kiritishicha, 1200 dollar miqdoridagi to‘g‘ridan to‘g‘ri to‘lovlar bundan oldingi iqtisodiyotni rag‘batlantirish qonun loyihasi formulasi asosida amalga oshiriladi. Ya’ni yiliga 75 ming dollargacha ishlab topadigan har bir fuqaroga yordam puli to‘liq to‘lanadi, 100 ming dollardan ortiq ishlab topadiganlar esa davlatdan hech narsa olmaydi.
Eslatib o‘tamiz, mart oxirida AQSh Kongressi Senati COVID-19 koronavirus pandemiyasi sharoitida AQSh kompaniyalari, aholisi va sog‘liqni saqlash tizimini iqtisodiy qo‘llab-quvvatlash chora-tadbirlari to‘g‘risidagi qonun loyihasini bir ovozdan ma’qullab, 2,2 trillion dollar miqdorida mablag‘ ajratgan edi. Aprel oyida esa Kongress iqtisodiyotni qo‘llab-quvvatlashga yana 484 milliard dollar ajratish to‘g‘risidagi dasturni ma’qullagandi.
Izoh (0)