Joriy yilning 23-iyul kuni “O‘zbekiston pochtasi” aksiyadorlik jamiyati Surxondaryo filiali direktori Muhiddin Mamatqulov 53 yoshida vafot etdi. Bu haqda Surxondaryo viloyati hokimligi matbuot xizmati ma’lum qildi.
Muhiddin Mamatqulov 1967-yilda Termiz tumanida tug‘ilgan. U 1992-yilda Toshkent elektrotexnika aloqa institutini, 2004-yilda Termiz davlat universitetini tamomlagan.
Qayd etilishicha, Muhiddin Mamatqulov turli yillarda viloyat Davlat pochta aloqa va matbuot tarqatish korxonasi boshlig‘i o‘rinbosari, viloyat “Matbuot uyushmasi” AJ boshlig‘i, “Surxondaryo pochtasi” OAJ direktori, “O‘zbekiston pochtasi” OAJ Toshkent filiali direktori, “Surxon Sardori” MChJ ijrochi direktori, “O‘zbekiston pochtasi” AJ Surxondaryo filiali direktori lavozimlarida faoliyat yuritgan.
“Surxondaryo viloyati hokimligi jamoasi pochta aloqasi xizmatlari rivojiga munosib hissa qo‘shib, xalqimiz hurmatiga sazovor bo‘lgan mehnatsevar va samimiy inson Mamatqulov Muhiddin Shermuhamedovichning vafoti munosabati bilan uning oila a’zolari va yaqinlariga chuqur ta’ziya bildiradi”, — deyiladi hokimlik matbuot xizmati xabarida.
Surxondaryo viloyati hokimligi matbuot xizmati 53 yoshli Muhiddin Mamatqulovning o‘limi sababiga aniqlik kiritmagan.
Bundan avval Qoraqalpog‘iston teleradiokompaniyasi direktori Baxitbek Elmonov, “Radioaloqa, radioeshittirish va televideniye markazi”ning kapital qurilish bo‘yicha direktori Alisher Abduazizov, “Nihol” mukofoti sovrindori, xonanda Abror Parpiyev, Markaziy bank raisining sobiq o‘rinbosari Ashur Qodirov, O‘zbekistonda xizmat ko‘rsatgan madaniyat xodimi, rassom Zubaydulla Botirov, “Suvsoz” DUK rahbari Tohir Mirhidoyatov vafot etgani haqida xabarlar berilgandi.
Izoh (0)