Joriy yil OTMning bakalavriat bosqichida o‘qish istagida onlayn hujjat topshirgan salkam 1,5 million abituriyentning 53,81 foizi yoki 798 ming 608 nafari kunduzgi ta’limda o‘qishni xohlab ro‘yxatdan o‘tgan. 648 ming 733 nafari (43,71 foiz) sirtqi ta’lim shakli, 36 ming 744 nafari (2,48 foizi) esa kechki ta’lim shaklini tanlagan. Bu haqda 22-iyul, chorshanba kuni AOKAda o‘tkazilgan matbuot anjumanida ta’kidlab o‘tildi.
“Daryo” muxbirining xabar berishicha, Vazirlar Mahkamasi huzuridagi davlat test markazi rahbariyati ishtirokidagi tadbirda imtiyozga ega abituriyentlar haqida ham ma’lumot berildi. Ular quyidagilar:
- 9 nafar Zulfiya nomidagi davlat mukofoti sohibasi;
- 6 nafar “Tarbiyachi” respublika tanlovi g‘olibi;
- 3 nafar “Nihol” mukofoti sovrindori;
- 2 ming 493 nafar xalqaro va respublika olimpiadalari, tanlovlar va musobaqalari g‘olibi;
- 14 nafar Yoshlar ishlari agentligi tavsiyanomasiga ega bo‘lganlar;
- 3 ming 133 nafar harbiy xizmatchilarning farzandi (5 foizlik);
- 130 nafar harbiy xizmatchilarning farzandi (otasi (onasi) halok bo‘lgan yoki nogiron bo‘lib qolgan);
- 2 ming 256 nafar ichki ishlar organlari xodimlari farzandi (3 foizlik);
- 49 nafar ichki ishlar organlari xodimlari farzandi (otasi (onasi) halok bo‘lgan yoki nogiron bo‘lib qolgan);
- 1 ming 29 nafar Temurbeklar maktablari bitiruvchisi;
- 365 nafar to‘liq davlat ta’minotidagi shaxslar;
- 2 ming 973 nafar So‘x tumani yoshlari.