Nima uchun oxirgi paytlarda mahallalarda reydlar o‘tkazilmayapti, ayniqsa, ko‘p qavatli uylar atrofida odamlar to‘planib, niqobsiz suhbat qurib o‘tirishibdi, yosh bolalar bemalol o‘ynab yurishibdi. Nima uchun ular nazoratga olinmayapti? Yuqoridagi savollarga AOKA huzurida tashkil etilgan brifingda Sanitariya-epidemiologiya nazorati davlat inspeksiyasi boshlig‘i Nurmat Otabekov javob berdi.

“Hozirgi paytda tegishli tashkilotlar, xususan tuman Sanitariya-epidemiologiya nazorati davlat inspeksiyasi , mahalla faollari, Milliy gvardiya va ichki ishlar bilan birgalikda bu borada ishlar olib borilyapti.

Biroq bir narsani anglab yetishimiz kerakki, respublikadagi 34 million aholi ustidan nazorat qilib bo‘lmaydi. Biz bir-birimizni nazorat qilishga ham o‘rganishimiz kerak. Bir-birimizga tanbeh berish, e’tiroz bildirish, tushuntirish orqali bu kabi holatlarni yengishimiz mumkin. Zero ular o‘zlarining sog‘lig‘ini asrashni xohlamas ekanlar, u holda siz bilan bizning salomatligimizni xavf ostiga qo‘yishlariga ham haqlari yo‘q!”, – deydi Nurmat Otabekov.

Avvalroq Nurmat Otabekov O‘zbekistonda antitana uchun test o‘tkazilib, aholining qancha qismida koronavirusga immunitet borligi aniqlanishini ma’lum qilgan edi.