Ijtimoiy tarmoqlarda “O‘zekspomarkaz”da koyka-o‘rinlar tayyorlanayotgani haqida gap-so‘zlar tarqalgan. Xabarlarga ilova qilingan fotosuratlarda ko‘rgazma markazi pavilonlariga bir-biridan pardevorlar bilan ajratilgan yotoqlar joylashtirib chiqilayotganini ko‘rish mumkin.
Manba aynan qancha yotoq-o‘rin tayyorlanayotganini ochiqlamadi, biroq bu shahar hokimligi tashabbusi bilan amalga oshirilayotgani, ehtimoliy eng og‘ir vaziyatga tayyorgarlik sifatida tayyorlanayotganini ta’kidladi. “Ehtimol, bu koyka-o‘rinlarga zarurat ham bo‘lmas”, — dedi manba.
Ma’lumot uchun, 19-iyul soat 10:00 holatiga ko‘ra kasallik tasdiqlangan va davolanishni davom ettirayotgan bemorlar soni Toshkent shahrida 5051 nafarni, Toshkent viloyatida esa 851 nafarni tashkil etmoqda. Ushbu 5902 nafar bemorning qanchasi Toshkent shahrida va qanchasi Toshkent viloyatida davolanayotgani, qanchasida kasallik alomatlarsiz (simptomlarsiz) kechayotgani haqida aniq ma’lumot yo‘q.
Iqtisodiy tadqiqotlar va islohotlar markazi rahbari Obid Hakimovning 13-iyul kuni e’lon qilingan intervyusida Toshkentda jami 16 ta kasalxonada koronavirus bilan kasallangan bemorlar uchun 3580 ta koyka-o‘rin ajratilganini ta’kidlagan edi. 18-iyul kuni Toshkent shahar hokimligi koronavirusga chalingan bemorlarni joylashtirish uchun yana 2358 ta koyka zaxirasi shakllantirilganini ma’lum qildi.
Eslatib o‘tamiz, Prezident Shavkat Mirziyoyev 15-iyul kuni bo‘lib o‘tgan videoselektorda koronavirusga qarshi kurashni samarali tashkil qilmagani uchun Toshkent shahar hokimi Jahongir Ortiqxo‘jayev (va sog‘liqni saqlash vaziri Alisher Shodmonov)ga hayfsan bergan edi. Shundan so‘ng hokim shahardagi kasalxonalarda bo‘lib, vaziyat bilan bevosita tanishgani ma’lum qilindi.
Izoh (0)