Toshkent viloyati Bo‘ka tumanida 67 yoshli ayol o‘zini yoqib yubordi. Ayolni profilaktika inspektori qutqarib qoldi, deb xabar beradi IIBB axborot xizmati.
Qayd etilishicha, 2020-yil 8-iyul kuni Bo‘ka tumani “Qoraquduq” mahalla fuqarolari yig‘ini profilaktika inspektori katta leytenant Farhod Qulmatov o‘z hududida xizmat olib borayotgan vaqtida, ushbu mahallada yashovchi 67 yoshli fuqaro M.X. (ayol) o‘zini yoqib yuborayotganini ko‘rib qolgan. Shundan so‘ng inspektor darhol olovni o‘chirish choralarini ko‘radi va fuqaroga birinchi yordam ko‘rsatib, uning hayotini saqlab qoladi.
Tuman markaziy shifoxonasi tomonidan fuqaro M.X.ga, I-II darajali kuyish tashxisi qo‘yilgan. Shuningdek, katta leytenant Farxod Qulmatov fuqaroni qutqarayotgan vaqtida, uning o‘zida (o‘ng ko‘l sohasi) ham II-III darajali kuyish jarohati borligi shifoxona ma’lumotnomasida ko‘rsatilgan.
Fuqaro M.X. suhbat davomida, oilasida o‘zaro kelishmovchilik kelib chiqqani va bundan qattiq ranjiganini aytib, o‘z joniga qasd qilish maqsadida o‘zini yoqib yuborganini bayon qilgan.
Hozirda mazkur holat yuzasidan Bo‘ka tumani prokuraturasi tomonidan tergovga qadar tekshiruv harakatlari olib borilmoqda.
Izoh (0)