Prezident Shavkat Mirziyoyev 14-iyul, seshanba kuni yoshlar va xotin-qizlar bandligini oshirish, ularni daromad manbayi bilan ta’minlash masalalari bo‘yicha o‘tkazgan videoselektor yig‘ilishida ta’lim tizimini jiddiy tanqid qildi. Bu haqda Prezident matbuot xizmati xabar qilgan.
“Yoshlar maktabdan ketdi. Maktab rahbarlarining e’tiborsizligi bilan ‘Nima uchun shuncha – 11 yil o‘qitib, ularga kasb o‘rgatmadik?’ degan savol hammani qiynashi kerak. Shu sababli maktabning yuqori sinflaridayoq kasbga o‘qitish tizimini joriy etishimiz zarurligini hayotning o‘zi majbur qilyapti. Agar shu ishni qilmasak, bolalarni tarbiya qila olmaymiz, ularga sharoit yarata olmaymiz. Maktabning oldiga savol qo‘yishimiz kerak, ‘Nima uchun ota-ona repetitor topib, oliy ta’limga kirgizyapti?’, ‘Nega davlat shuncha pul ajratadi-yu, maktab bitiruvchilarini OTMlarga qamrab olish 50 foiz ham emas?’. Deputatlar, Oliy Majlis palatalarining raislari ushbu masalani ham qonunda ko‘rib chiqishi kerak va bu adolatli talab”, — degan Shavkat Mirziyoyev.
Shuningdek, prezident yig‘ilish davomida avval uch, besh yoki o‘n yil muqaddam bunday sharoitlar yaratishning imkoni bo‘lmaganini ham qayd etdi.
“Nima uchun bugun bu talab qo‘yilmoqda? Tasavvur qiling, uch yil, besh yil yoki o‘n yil avval bu talabni qo‘ya olmasdik. O‘qituvchilar ham, o‘quvchilar ham uch oy paxta, bir oy chopiq, o‘n besh kun pilla bilan ovora edi. Ko‘cha supurish bilan ovora edi! U vaqtda bunday shart qo‘ya olmasdik. Hozir maktablarda u narsalar yo‘q. Endi talab qo‘yishning vaqti-soati keldi desak, to‘g‘ri bo‘ladi”, — deya ta’kidlagan Shavkat Mirziyoyev.
Avval mazkur yig‘ilishda davomida O‘zbekistonning har bir tuman va shaharida hamda OTMlarida axborot texnologiyalariga o‘qitish markazlari ochilishi belgilab qo‘yilgani, 2020/2021-o‘quv yilidan maktab direktori va o‘qituvchilarga o‘quvchilarning OTMga kirishi va o‘z ishini topishiga qarab haq to‘lanishi aytib o‘tilgani haqida xabar berilgandi.
Izoh (0)