Xitoyning WeRide startapi mamlakatda birinchi bo‘lib haydovchisiz boshqariluvchi robotlashtirilgan taksi servisini ishga tushirishni rejalashtirmoqda. Hukumat ushbu dasturni Guanchjouda sinovdan o‘tkazishga ruxsat bergan, deb yozadi Reuters.
Kompaniyadagilarning ta’kidlashicha, mashinani sinovdan o‘tkazish bir haftadan buyon davom etmoqda va barchasi rejadagidek.
Agarda natijalar startap, hukumat, politsiya vakillari va albatta, yo‘lovchilarni qoniqtirgudek bo‘lsa, loyiha keyingi oydan ish boshlashi mumkin. Ma’lumotlarga ko‘ra, robotaksi hozircha faqat bitta tuman hududida harakatlanadi.
Haydovchisiz avtomobilning harakatini operatorlar kuzatib boradi, yo‘lda biror narsa sodir bo‘lsa, ular transport vositasining boshqaruvini o‘z qo‘llariga oladi. Vaqt o‘tishi bilan operatorlar markazidan ham voz kechiladi.
“Biz uchun shaharning barcha hududlarida turli xil yo‘l-transport hodisalarini ko‘rib chiqish, shuningdek, robotaksining xatti-harakati va reaksiyasini yaxshiroq tushunish juda muhim. Barchasi to‘liq avtomatlashtirilgach, biz operatorlardan voz kechamiz va yo‘llardagi to‘liq nazoratni robotga topshiramiz”, — deyiladi xabarda.
Ma’lumot uchun, WeRide kompaniyasi transport vositalarini avtomatlashtirish bilan anchadan buyon shug‘ullanib keladi. Uning hamkorlari orasida Nissan, Renault va Mitsubishi kabi avtomobilsozlik kompaniyalari mavjud.
Izoh (0)