Shayxontohur tumani bo‘yicha IIO FMB huzuridagi Tergov bo‘limi tomonidan firibgarlik holati yuzasidan 33 yoshli Z.A.ga nisbatan bo‘lgan jinoyat ishi bo‘yicha dastlabki tergov harakatlari yakunga yetdi, deb xabar bermoqda IIV huzuridagi Tergov departamenti.
Xabarga ko‘ra, Z.A. muqaddam sudlangan bo‘lib, unga nisbatan firibgarlik holati yuzasidan boshqa jinoyat ishi mavjud bo‘lgan. U 2020-yil 10-fevralidan 17-fevraligacha Shayxontohur tumani Tinchlik ko‘chasida yashovchi M.X. ismli ayolning yashash uyiga 3 marta borib, unga tegishli jami 37 million 968 ming 304 so‘mlik Turkiyadan keltirilgan kiyim-kechaklar pulini 2020-yilning may oyiga qadar berish sharti bilan olib ketib, shu kungacha olingan kiyim-kechaklarni sotib, pullarini o‘z ehtiyojlariga ishlatib yuborgan.
Mazkur holat yuzasidan Shayxontohur tumani bo‘yicha IIO FMB huzuridagi Tergov bo‘limi tomonidan Z.A.ga nisbatan Jinoyat kodeksining 168-moddasi 3-qismi “b” bandi (Firibgarlik) bilan jinoyat ishi qo‘zg‘atilgan.
Dastlabki tergov jarayonida Z.A.ga tegishli moddalar bilan ayb e’lon qilinib, unga nisbatan qamoqqa olish tarzidagi ehtiyot chorasi qo‘llanilib, yetkazilgan moddiy zararning muayyan qismi, ya’ni 2 million 320 ming so‘m qoplangan.
Jinoyat ishi ayblov xulosasi bilan tegishli sudlovga oshirish masalasini ko‘rib chiqish uchun tuman prokuraturasiga yuborilgan.
Departamentdan ma’lum qilinishicha, mazkur jinoyatni sodir etgan shaxs bazaviy hisoblash miqdorining uch yuz baravaridan to‘rt yuz baravarigacha miqdorda jarima yoki ikki yildan uch yilgacha axloq tuzatish ishlari yoxud muayyan huquqdan mahrum etilgan holda 5-8 yilgacha ozodlikdan mahrum qilish bilan jazolanishi mumkin.
Avval Toshkentda masjid qurilishiga ehson qilish bahonasida qariyb 34 million so‘mni AQShga tegishli SIP virtual raqami vositasida o‘zlashtirgan firibgar qo‘lga olingani, Toshkent viloyatida 45 nafar fuqaroning 150 million so‘m pulini talon-toroj qilgan shaxs 5 yilga ozodlikdan mahrum qilingani, Buxoroda firibgarlik yo‘li bilan bir qancha jinoyatlar, o‘g‘irlik va tovlamachilik qilgan jinoiy guruh faoliyati fosh qilingani haqida xabarlar berilgandi.
Izoh (0)