Qashqadaryo viloyatining Chiroqchi tumanida “DAF XF 105” rusumli yuk avtomashinasi va Orlando to‘qnashdi. Ikki kishi voqea joyida vafot etdi. Jarohat olgan olti nafar yo‘lovchi esa Respublika shoshilinch tibbiy yordam ilmiy markazi Qashqadaryo filialiga olib borilgan. Bu haqda “Daryo”ga viloyat sog‘liqni saqlash boshqarmasi axborot xizmati rahbari Nuriddin Egamov ma’lum qildi.
Qashqadaryo viloyat IIB YHXB axborot xizmati rahbari Javlon Baxtiyevning qo‘shimcha qilishicha, voqea 2020-yilning 12-iyul kuni 00:20 da Chiroqchi tumani hududida sodir bo‘lgan.
Ma’lum bo‘lishicha, Chiroqchi tumani hududidan o‘tuvchi 4R 87 avtomobil yo‘lining 47-kilometrida, Xorazm viloyati Xonqa tumanida yashagan haydovchi M.M. boshqaruvidagi Orlando ikkinchi darajali yo‘ldan kelishiga qaramay “Yo‘l bering” belgisiga va svetoforning qizil chirog‘iga amal qilmagan holda harakatini davom ettirgan va asosiy yo‘ldan kelayotgan Chiroqchi tumanida yashovchi haydovchi boshqaruvidagi “DAF XF 105” rusumli yuk avtomashinasi bilan to‘qnashgan.
Natijada Orlando haydovchisi M.M. va yo‘lovchi T.J. voqea joyida vafot etgan.
Qashqadaryo viloyatining Dehqonobod tumanida yashovchi 1992-yilda tug‘ilgan Q.D., Xorazm viloyati Urganch tumanida yashovchi 1983-yilda tug‘ilgan A.Sh., 1986-yilda tug‘ilgan Q.N., 2010-yilda tug‘ilgan J.Sh., 2013-yilda tug‘ilgan J.N. va 2016-yilda tug‘ilgan J.D. olgan tan jarohati sabab shifoxonaga yotqizilgan.
“To‘rt nafari og‘ir, ikki nafari o‘rta og‘ir bo‘lgan bemorlar standart bo‘yicha tekshiruvdan o‘tkazilgan, zarur tibbiy yordam ko‘rsatilmoqda”, — deyiladi viloyat sog‘liqni saqlash boshqarmasi axborot xizmati bergan ma’lumotda.
Eslatib o‘tamiz, avvalroq Buxoroda 2020-yil 7-iyul kuni tonggi 05:25 da sodir bo‘lgan tez yordam mashinasi ishtirokidagi avariya haydovchining uyqusirashi oqibatida sodir bo‘lgani va ikki nafar kishi vafot etgani ma’lum qilingandi. Jizzaxda Nexia va Damas to‘qnashishi oqibatida esa ikki kishi halok bo‘lgani, yana uch nafar fuqaro jonlantirish bo‘limidaligi xabar berildi. YTHlar soni keskin ortgani sabab Buxoroda haydovchilar xushyorligini oshirish maqsadida A-380 trassasiga YTHga uchragan mashina maketi o‘rnatildi.
Izoh (0)