Surxondaryo viloyati Termiz tumanida 1000 o‘rinli karantin zonasi qisqa muddatda qurib bitkazildi. Maxsus jihozlangan konteynerlardan iborat karantin zonasi tez orada foydalanishga topshiriladi, deb xabar beradi “Kun.uz”.
Ma’lumotlarga ko‘ra, karantin zonasining ventilyatsiya, tibbiy kislorod yetkazib berish, kommunikatsiya tizimlari zamonaviy tarzda jihozlangan. Shuningdek, hududni elektr energiyasi, gaz, suv tarmoqlariga ulash ishlari jadallik bilan amalga oshirilgan.
Karantin hududini barpo etishda barcha sanitar-gigiyenik normalar hisobga olingan bo‘lib, qurilish ishlari ikki smenada tashkil qilingan.
Karantin zonasida qurilish ishlari 5-iyul kuni yakunlangan bo‘lib, u tez orada foydalanishga topshiriladi.
Avvalroq O‘zbekistonda koronavirusdan uy sharoitida davolanayotganlarga tibbiy yordam berish uchun mobil guruhlar tashkil etilishi, talabalar turar joylari karantinda saqlash joylariga aylantirilishi to‘g‘risida xabar berilgan edi.
Eslatib o‘tamiz, mart oyida Toshkent viloyatining Yuqori Chirchiq tumani O‘rtasaroy hududidagi 16 gektar maydonda karantin zonasi barpo etilgan edi. 10 700 kishini qabul qilishga mo‘ljallangan karantin markazi aprel oyida foydalanishga topshirilgan edi. Bu yerga xorijdan O‘zbekistonga kirib kelgan fuqarolar 14 kunlik karantinga joylashtiriladi.
Izoh (0)