Qashqadaryodagi Uzbekistan GTL zavodi qurilishida 127 kishida koronavirus aniqlandi

Qashqadaryo viloyati G‘uzor tumanida qurilayotgan Uzbekistan GTL zavodi qurilishida qatnashayotgan 127 nafar kishida koronavirus aniqlandi. Bu haqda Qashqadaryo viloyat Sog‘liqni saqlash boshqarmasiga tayanib O‘zA xabar berdi.

Xabar berilishicha, mazkur fuqarolar koronavirusga chalingan bemorlar bilan muloqotda bo‘lgandan keyin karantinga joylashtirilgandi.

Qayd etilishicha, ayni paytda korxonaning qurilish hududida infeksiya tarqalishining oldini olish bo‘yicha barcha zarur choralar ko‘rilmoqda.

Eslatib o‘tamiz, Sog‘liqni saqlash vazirligi 8-iyul kuni Qashqadaryo viloyatida 161 kishida koronavirus aniqlangani, ulardan 34 nafari aholi orasida qayd etilgani haqida xabar bergandi.

Ma’lumot uchun, ayni paytda Qashqadaryo viloyatida jami 2793 kishi, jumladan, 576 kishi tibbiyot muassasalarida, 2217 kishi uy sharoitida karantinga olingan.

Eslatib o‘tamiz, O‘zbekistonda koronavirus bilan bog‘liq vaziyatning keskinlashayotgani sababli 10-iyuldan 1-avgustgacha mamlakatda qat’iy karantin choralari joriy qilinadi. 10-iyuldan to‘ylar, oilaviy va ommaviy tadbirlar taqiqlanadi, avtotransport harakati cheklanadi, buyum bozorlari va bolalar bog‘chalari yopiladi, xalqaro aviaqatnovlar ikki baravarga qisqartiriladi, koronavirusdan uy sharoitida davolanayotganlarga tibbiy yordam berish uchun mobil guruhlar tashkil etiladi, O‘zbekistonning barcha hududlari epidemiologik toifasi “qizil” bo‘ladi. Shuningdek, O‘zbekistondagi sanoat va qurilish obyektlari qat’iy karantin qoidalari asosida faoliyatini davom ettirishi mumkin bo‘ladi.