Xitoyda bir sutkada 3 kishida koronavirus aniqlandi, Janubiy Koreyada esa kasallanganlar soni 51 kishiga ko‘paydi

Xitoyda so‘nggi sutkada koronavirus bilan kasallanish bo‘yicha 3 ta va kasallik belgisiz o‘tayotgan 3 ta holat aniqlandi, bemorlarning 10 nafari sog‘aydi, vafot etish holatlari qayd etilmadi. Bu haqda Xitoy Sog‘liqni saqlash milliy komissiyasiga tayanib, “RIA Novosti” xabar berdi.

Qayd etilishicha, aniqlangan 3 ta holatning barchasi mamlakatning o‘zida, Pekin shahrida yuqtirilgan.

Mamlakatda umumiy hisobda 83 534 kishi koronavirusga chalingan, ularning 78 479 nafari sog‘aygan, 4634 nafar bemor COVID-19 qurboniga aylangan. Kasalxonada 421 kishi davolanishda qolmoqda.

Shuningdek, Xitoyda kasallik belgisiz o‘tayotgan 3 ta holat aniqlangan. Shunday kishilarning yana 100 nafari kuzatuvda bo‘lib turibdi.

Kasalliklar profilaktikasi va nazorati markazi (KCDC) ma’lumotlariga ko‘ra, yangi kasallanish holatlarining 36 nafari mamlakatning o‘zida, qolgan 15 tasi chetdan yuqtirilgan.

Sutka davomida 76 kishi sog‘ayib, tuzalganlarning umumiy soni 11 613 nafarga yetdi. Kasallik qurbonlari soni o‘zgarmagan bo‘lib, 282 nafarni tashkil etmoqda.

Mamlakatda koronavirusni aniqlash bo‘yicha qariyb 1,28 millionta test o‘tkazilgan.

KCDC ma’lumotlariga ko‘ra, Janubiy Koreya 1-iyuldan boshlab “Remdesivir” dori vositasini sotib olishni boshladi. “Remdesivir” Yevropa Ittifoqida ruxsat olish uchun tavsiya qilingan koronavirusga qarshi ilk dori vositasi hisoblanadi. Bu dori vositasi og‘ir ahvoldagi bemorlarni davolashda qo‘llaniladi.

Qayd etilishicha, 7-iyulga qadar kasalxonalar “Remdesivir” bilan bepul ta’minlanadi, 8-iyuldan boshlab esa uning narxi muhokama qilinadi.

Preparat Amerikaning Gilead Sciences biofarmatsevtik kompaniyasi tomonidan ishlab chiqariladi.