Rossiyaning “Aeroflot” aviakompaniyasi chegaralar yopilgani va Rossiya hukumatining rasmiy chekloviga qaramasdan, yozning boshidan buyon doimiy xalqaro aviaqatnovlarni amalga oshirmoqda. Bu haqda uchta aviakompaniya, shu jumladan, “Aeroflot” xodimlariga tayanib, “Vedomosti” xabar berdi.
Aviatashuvchining chiptalar savdosi tizimidagi ma’lumotlarga ko‘ra, hozirgi paytda kompaniyaning Moskvadan Frankfurt, Parij, London, Nyu-York, Seul, Tel-Aviv, Nitsa, Barselona, va Rimga uchuvchi reyslari mavjud.
Nashrning yozishicha, bu reyslar eksklyuziv xarakterga ega. Ular hech qanday reklama qilinmaydi, chiptalar savdosi reyslarga bir haftadan kamroq vaqt qolganda ochiladi, ularning narxi esa bir necha baravar qimmat turadi.
Yevropa chegaralarining yopiqligi sababli bu reyslarga chiptalarni faqatgina Yevropa Ittifoqi fuqarolari yoki Yevropa mamlakatlarining birida doimiy yashash huquqiga yoki uning fuqaroligiga ega bo‘lgan rossiyaliklar sotib olishi mumkin. Bu reyslarga qaytish chiptalari sotilmaydi.
“Aeroflot”ning ikki xodimi aytishicha, kompaniya mazkur yo‘lovchi tashish reyslarini yuk tashuvchi reys ko‘rinishida amalga oshirib, cheklovlarni chetlab o‘tmoqda. “Xalqaro yuk tashuvchi reyslarga ruxsat berilgan. Bu reyslar yuk tashuvchi reys sifatida rasmiylashtirilgan, biroq ‘Rosaviatsiya’ning ruxsati bilan ularga chiptalar sotilmoqda”, — deya ma’lum qilgan kompaniya vakillari.
Koronavirus pandemiyasi sababli Rossiya mart oyining oxiridan boshlab xalqaro aviaqatnovlarni to‘xtatgan. Aviakompaniyalarga faqat charter reyslarini amalga oshirishga ruxsat berilgan.
Avvalroq Rossiya 15-iyuldan boshlab xalqaro aviaqatnovlarni qisman tiklashni rejalashtirayotgani haqida xabar berilgandi.
Izoh (0)