Toshkentdagi Epidemiologiya, mikrobiologiya va yuqumli kasalliklar ilmiy-tekshirish instituti klinikasida 19 nafar, Buxoro viloyatida 6 nafar, Samarqand viloyatida 2 nafar, Andijon viloyatida 1 nafar, jami 28 nafar koronavirus infeksiyasiga chalingan bemor sog‘ayib, o‘z uyiga kuzatildi. Bu haqda Sog‘liqni saqlash vazirligi xabar bergan.
Xabarda qayd etilishicha, Toshkentda infeksiyadan sog‘ayganlarning 10 nafari erkak, 9 nafari ayol. Eng yoshi ulug‘i 66 da, eng kichigi esa 10 yoshda. Toshkent shahri va viloyatida epidemiya boshlanganidan beri 4211 kishida koronavirus infeksiyasi aniqlangan, sog‘ayganlar soni esa 2470 nafarni tashkil qilmoqda.
Andijon viloyatida COVID-19’dan tuzalganlar safiga 43 yoshli erkak qo‘shildi va sog‘ayganlarning umumiy soni 181 nafarga yetdi. 13 nafar bemor davolanmoqda.Buxoro viloyatida 2 nafar erkak va 4 nafar ayol kasallikdan forig‘ bo‘lgan. Eng yoshi kattasi 52 da, eng kichigi esa 2020-yilda tug‘ilgan qizaloq. Mazkur hududda koronavirus infeksiyasidan sog‘ayganlar soni 478 nafarga yetib, 29 nafar bemor davolanishni davom ettirmoqda.
Samarqand viloyatida 51 yoshli ayol va 26 yoshli erkak koronavirusdan tzualgan va infeksiyadan sog‘ayganlar soni 386 nafarni tashkil qilmoqda. Viloyatda 26 nafar bemor davolanmoqda.
2020-yil 24-iyun soat 16:30 holatiga ko‘ra O‘zbekistonda koronavirusdan tuzalganlarning umumiy soni 4588 nafarga yetgan.
O‘zbekistonda 24-iyun soat 10:00 holatiga ko‘ra, koronavirusga chalinganlar soni 93 kishiga ko‘payib, 6755 nafarga yetgan. Soat 17:00 holatiga ko‘ra 92 ta yangi holat aniqlangan va COVID-19 bilan kasallanganlarning umumiy soni 6847 nafarni tashkil qilmoqda. SSV bergan axborotga ko‘ra, 18 nafar bemorning ahvoli og‘ir, 4 nafar bemorning ahvoli esa o‘ta og‘ir holatda.
O‘zbekistonda iyun oyi davomida to‘rt marta bir kunda kasallanganlar soni 200 nafardan oshgan: 7-iyunda — 237 kishi, 16-iyunda — 230 kishi, 20-iyunda — 207 kishi hamda 23-iyunda — 201 kishi.
Izoh (0)