Sog‘liqni saqlash vazirligi ma’lumotiga ko‘ra, koronavirusga chalinish holatlari nafaqat Toshkent shahri va Toshkent viloyatida, balki Surxondaryo hamda Xorazmda ham aholi orasida ham qayd etilmoqda.
“Profilaktika maqsadida namuna topshirgan fuqarolarda ham kasallik tasdiqlanayotgani koronavirusning odamlar orasida yuqish xavfini yanada oshirmoqda.
19-iyunda O‘zbekistonda koronavirus infeksiyasi tasdiqlangan 179 nafar bemordan 29 nafari aholi orasida aniqlangan bo‘lsa, 20-iyun kuni yang kasallanish holatlari qayd etilgan 207 nafar bemordan 19 nafari aholi orasida tasdiqlandi.
20-iyunda aholi orasida koronavirus aniqlanish holatlari hududlar kesimida: Toshkent shahrida 13 ta, Toshkent viloyatida 4 ta, Surxondaryo va Xorazm viloyatida esa 1 tadan.
Toshkent shahridagi sanoat korxonasining 4 nafar xodimi va ularning 5 nafar oila a’zolarida, Uchtepa tumani yashovchi M.M.da (oromgohga ketish maqsadida namuna topshirgan), Mirobod tumanida yashovchi N.Sh.da (profilaktika maqsadida namuna topshirgan), Shayxontohur tumanida yashovchi uy bekasi D.Z.da (tana harorati ko‘tarilib, xususiy shifoxonaga murojaat qilgan), Olmazor tumani Mudofaa ishlari bo‘limi xodimi E.Sh.da (harbiy chaqiriqqa kelgan bolalar bilan muloqotda bo‘lgan) kasallik qayd etilgan.
Toshkent viloyati Qibray tumanida yashovchi Sh.E.da (ishga kirish maqsadida namuna topshirgan), Mudofaa ishlari boshqarmasi Yuqori Chirchiq tumani xodimi D.A.da (mehnat ta’tilidan ishga chiqqan va tana harorati ko‘tarilishi sababli namuna topshirgan), Yangiyo‘l tumanida yashovchi M.M.da va Chirchiq shahrida yashovchi I.N.da (profilaktika maqsadida namuna topshirishgan), Surxondaryo viloyati Jarqo‘rg‘on tumani yashovchi Sh.E.da (Toshkent shahrida yollanma ishchi bo‘lgan, tana harorati ko‘tarilib, o‘zi namuna topshirgan) hamda Xorazm viloyatida Toshkent viloyatidagi MChJga qarashli yuk avtomashinasi haydovchisi V.T.da (viloyatga kirish blok postida namuna olingan) ham koronavirus infeksiyasi tasdiqlangan.
SSV matbuot xizmatining xabar qilishicha, ushbu holatlar yuzasidan epidemiologik surishtiruv ishlari olib borilmoqda.
O‘zbekistonda COVID-19 koronavirus infeksiyasini yuqtirib olgan bemorlarning 15 nafari og‘ir, 1 nafari esa o‘ta og‘ir ahvolda.
Eslatib o‘tamiz, O‘zbekistonda 20-iyun kuni jami 207 kishida koronavirus aniqlangan. Bu uchinchi marta bir kun ichida 200 dan ortiq odamda koronavirus aniqlanishi, avval 7-iyunda 237 kishida, 16-iyunda 230 kishida koronavirus aniqlangan. Hozirgacha O‘zbekistonda koronavirusga chalingan bemorlar soni 6000 nafardan oshgan. Bemorlar soni 5000 dan 6000 ga yetishi uchun 6 kun kerak bo‘ldi.
Izoh (0)