Chuvashistonning sobiq rahbari Mixail Ignatyev vafot etdi. Bu haqda respublikaning amaldagi prezidenti Oleg Nikolayev bergan axborotga tayanib, “RIA Novosti” xabar qilgan.
Ignatyev 58 yoshda edi. “Interfaks” manbasi sobiq amaldorning koronavirus bilan kasallanganini bildirgan.
Avval Ignatyevning may oyida Sankt-Peterburgdagi kasalxonaga tushib qolgani ma’lum bo‘lgandi. U ikki tomonlama pnevmoniya tashxisi bilan davolanishga olib kelingan va esktrokorporal membrana oksigenatsiya apparatiga (qonga kislorod yetkazib beradi) ulab qo‘yilgandi.
Sobiq gubernatorning o‘limiga yurak-qon tomir yetishmovchiligi sabab bo‘lgan, deb yozmoqda Almazov nomidagi Milliy tibbiy tadqiqotlar markazi bosh shifokori o‘rinbosari Raisa Konashkovaga asoslanib “TASS”.
“Yurak xurujidan keyin bemorda og‘ir yurak yetishmovchiligi shakllangan va rivojlangan, oqibatda ichki organlar ishlashida buzilishlar kuzatilgan. Vaziyat ikki tomonlama pnevmoniya holatigacha yomonlashgan”, — degan shifokor.
Konashkova Ignatyevning 2019-yilda ham muolajalar olgani va bir necha marta og‘ir ahvolda kasalxonaga olib kelinganini qayd etgan. Biroq o‘lim holatiga koronavirusning aloqador yoki aloqador emasligi borasida izoh berilmagan.
Mixail Ignatyev Chuvashiston prezidentligiga 2010-yilda kelgan. 2020-yil yanvar oyida Rossiya Federatsiyasi rahbari Vladimir Putin ishonchni yo‘qotgani uchun uni o‘z lavozimidan ozod qilgan. Ignatyev prezidentni sudga bergan va ishdan olinishi noqonuniy ekanini isbotlashga uringan.
Ignatyevning haydalishiga ikki katta mojaro sabab ekani aytilgandi. Avvaliga u hukumatni tanqid qilgan jurnalistlar va blogerlarni “tinchitish” bilan tahdid qilgan, keyinroq ommaviy tadbir davomida FVV xodimini o‘zi baland ko‘tarib turgan yangi o‘t o‘chirish mashinasi kalitini olish uchun sakrashga majburlagandi.
Izoh (0)