“O‘zbekiston Respublikasi hududida elektron pullarning chiqarilishi va muomalada bo‘lishi qoidalari” talablariga muvofiq, to‘lov tashkiloti litsenziyasiga ega bo‘lgan Brio Group MChJ OSON elektron pullar tizimining operatori sifatida o‘z faoliyatini boshladi. Bu haqda Markaziy bank matbuot xizmati xabar berdi.
Mazkur elektron pullar tizimining emitenti bo‘lib “Turkiston” xususiy aksiyadorlik tijorat banki hisoblanadi. Elektron pullar tizimi to‘g‘risidagi ma’lumot 16-iyun kuni Markaziy bankning Elektron pullar tizimi reyestriga kiritilgan.
Spot’ning yozishicha, OSON so‘m yordamida mobil aloqa, internet, kommunal xizmatlar, onlayn o‘yinlar uchun to‘lovlarni amalga oshirish mumkin. So‘mni qabul qilishga nafaqat global, balki milliy servislar ham ulanadi. Kafe, restoran va do‘konlar egalari mazkur tizim yordamida naqdsiz to‘lovlarni qabul qilishi ham mumkin.
Shuningdek, kompaniyaning ma’lum qilishicha, ular xalqaro elektron pul tizimlari bilan, xususan, PayPal bilan hamkorlikni yo‘lga qo‘ymoqda.
2018-yilda PayPal nima sababdan O‘zbekistonda ishlay olmasligi, mamlakat qonunchiligi jismoniy shaxslarga pullarni xorijiy valyutada saqlashga ruxsat bermasligi, elektron hamyonlar esa xorijdagi hisob raqamlarga tenglashtirilishi haqida ma’lumot berilgandi. 2019-yilning oktabrida esa qonunchilikka o‘zgartirish kiritilib, o‘zbekistonliklarga xorijda hisob raqam ochishga ruxsat berildi. Biroq hamon O‘zbekiston PayPal’ga ulanmagan Markaziy Osiyodagi yagona davlat bo‘lib qolmoqda.
Izoh (0)