Daniya hukumati iqtisodiyotni tiklash uchun kompleks reja tuzilganini ma’lum qildi. Rejada koronavirus pandemiyasi sababli aholi va kichik biznesga yordam berish taklif qilinadi. Iqtisodiyotni tiklash uchun jami 60 milliard kron (9,04 milliard dollar) sarflanadi. Bu haqda Daniya Moliya vazirligi xabar berdi.
Ma’lum qilinishicha, mazkur mablag‘larni muzlatib qo‘yilgan ta’til pullari hisobidan ajratish rejalashtirilmoqda. Mazkur ta’til pullari xodimlar pensiyaga ketayotganda berilishi uchun muzlatib qo‘yilgan.
Har bir ishlaydigan daniyalik 19 ming kron (qariyb 3 ming dollar) yordam puli oladi, soliqlarni hisobga olganda yordam puli miqdori 15 ming kron (2,3 ming dollar). Biroq moliya vaziri Nikolay Uammenning so‘zlariga ko‘ra, “texnik sabablar”ga ko‘ra, bu mablag‘lar fuqarolarning hisobraqamiga birdaniga emas, balki bosqichma-bosqich, biroq oktabr oyidan kechikmagan holda kelib tushadi.
Ma’lum qilinishicha, iqtisodiyotni tiklash bo‘yicha reja — hukumat va bir qator partiyalarning kelishuvi natijasi. U sekinlik bilan avval qabul qilingan yordam dasturlarining o‘rnini egallaydi. Aholi va kompaniyalarni qo‘llab-quvvatlash haqidagi kelishuv 19-martda imzolangan, keyinroq Daniya hukumati qo‘shimcha choralarni qabul qilgan.
Mart oyining boshidan Daniyada maktablar, bolalar bog‘chalari, restoranlar, kafelar va sport zallari yopiq edi, shuningdek, xorijliklarning mamlakatga kirishiga ham cheklov joriy qilingandi. Aprel oyining boshida mamlakat hukumati koronavirus sababli joriy qilingan cheklovlarni yumashatishga kirishishini ma’lum qildi. Xususan, aprel oyining o‘rtasida bolalar bog‘chalari va boshlang‘ich maktablar o‘z ishini qayta tikladi. Odamlarning 10 kishidan ortiq to‘planishiga qo‘yilgan taqiq may oyigacha o‘z kuchida qoldi.
Pandemiya boshidan buyon Daniyada 12,4 ming kishida koronavirus aniqlangan, 558 kishi kasallik oqibatida vafot etgan.
Izoh (0)