Bo‘stonliq tumaniga olib boruvchi avtomobil yo‘lida dam olish kunlari fotoradarlar orqali 2218 ta qoidabuzarlik aniqlangan. Bu haqda Toshkent viloyati IIBB Yo‘l harakati xavfsizligi bosh boshqarmasi matbuot xizmati xabar qilgan.

Xabarga ko‘ra, Respublika maxsus komissiyasining yig‘ilish bayoniga muvofiq karantin qoidalari yumshatilganligi va ichki turizmga ruxsat berilganligi sababli Toshkent viloyatining Bo‘stonliq tumaniga dam olish maqsadida tashrif buyuruvchilar soni ko‘paygan. Tumanga olib boruvchi 4R12 Bektemir–Chirchiq–G‘azalkent–Chorbog‘ avtomobil yo‘lida dam olish kunlari avtomobillar oqimi keskin oshgan.

Mazkur avtomobil yo‘lida yo‘l transport hodisalarining oldini olish va avtomobillarning havfsiz xarakatlanishlarini ta’minlash maqsadida maxsus avtomatlashtirilgan foto va video qayd etish texnika vositalari onlayn rejimda aynan yo‘l transport hodisalari ko‘p sodir bo‘ladigan joylarda ishlatilgan.

Dam olish kunlari mobaynida ushbu fotoradarlar orqali 2218 ta belgilangan tezlikni me’yoridan oshirish holatlari qayd etilgan. Qoidabuzarliklarni sodir etgan fuqarolarga nisbatan qonunchilikda belgilangan tartibda jarimalar belgilanib, chiqarilgan qarorlar “O‘zbekiston pochtasi”ning ma’lumotlarni qayta ishlash markazi orqali qoidabuzarlik sodir etgan haydovchi yoki yuridik shaxsning manziliga yetkazilgan.

Tahlillarga ko‘ra, 4R12 avtomobil yo‘lida 2019-yilning 1-iyunidan 15-iyuniga qadar 3 ta inson o‘limi bilan bog‘liq yo‘l transport hodisasi sodir bo‘lgan bo‘lsa, 2020-yilning mos davrida bu kabi salbiy hodisalar kuzatilmagan.