“Eron kelinlarining 26 yoshli onasi”. 530 nafar qizni turmushga bergan Sima Alipur haqida

Tehran Times nashrining yozishicha 26 yoshli Sima Alipur “Eron kelinlarining onasi” deya e’tirof qilingan, u mamlakatdagi to‘ylarga homiylik qiluvchi eng yosh tadbirkorlardan biri hisoblanadi.

To‘rt yil avval Simaning turmush o‘rtog‘i saraton xastaligi sabab vafot etgan. Musibatdan tushkunlikka tushgan ayol o‘z joniga qasd qilmoqchi bo‘ladi, biroq keyinchalik boshqa kelinlarni baxtli qilish niyati sabab hayotga, yashashga bo‘lgan umid va ishonchi qaytadi.

Shundan buyon Alipur jami 530 nafar kam ta’minlangan oilalarning qizlarini turmushga berdi. Sima 200 nafar mehmonga mo‘ljallangan nikoh marosimlarini tashkil qilib, to‘ylar uchun pullar ajratgan.

Nashrdagi maqolada Eronda bu kabi xayriya ishlari bilan taxminan 500 nafarga yaqin inson shug‘ullanishi qayd etilgan.