O‘zbekistonda xizmat ko‘rsatgan artist Behzod Muhammadkarimov “Daryo” internet-nashri uchun eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.

Foto: “Daryo”

Behzod Muhammadkarimov suhbat davomida AQShda mardikorlik qilgan kunlari haqida gapirib berdi.

Amerikaga borgunimcha harbiy xizmatni, gastrol safarlarini musofirchilik hisoblab yurar ekanman, aslida unday emas ekan. Harbiyga borganimizda bizga mas’ul odamlar bo‘lar edi, gastrollarda ham shunday edi. Haqiqiy musofirchilikni esa Amerikada ko‘rdim. U yerda ish topolmasangiz yoki ishingizni yo‘qotib qo‘ysangiz, birdan “minus”ga ketishni boshlar ekansiz. Shu sababli tirikchilik uchun duch kelgan ishni qilasiz.

Misol uchun, men biznikilar qilishi mumkin bo‘lgan barcha ishlarni qildim. Yashirmayman, qora ishlarni qildim. Ishni mehmonxonada choyshab va yostiqlarni tashishdan boshladim. Keyin magazinda pollarni tozalab, laklaydigan ishga kirdim. Asosan, kechqurun ishlardim. Bu ham yetmagandek kunduzi ham ish olardik, kunduzi topganimizga Amerikada yashardik, kechqurun ishlagan pulimizni Toshkentga — uyga yuborardim.

Kechasi bilan ishlab, kunduzi yana peshingacha ishlardim. Har kuni shunday: dam olish kunlarisiz ishlardim. Bir marta — unda ham Yangi yilda bir kun dam olardim. To‘g‘risini aytsam, faqat kechqurun ishlaganimiz uchun yillab quyoshni ko‘rmagan vaqtlarim bo‘ldi.  Restoranda idish-tovoq yuvdim, ofitsiantlik qildim, pitssa tashidim, qurilishda ishladim, yuk tashuvchi bo‘lib, uy ko‘chirdim. Hattoki muzqaymoq chiqaradigan sexda ishlab, muzqaymoq ham tayyorladim.  Bir yigitga qirq hunar oz, degan maqolni amalda o‘zimda ko‘rdim va isbotladim.

Behzod Muhammadkarimov, O‘zbekistonda xizmat ko‘rsatgan artist

Ma’lumot uchun, Behzod Muhammadkarimov “Shaytanat”, “Amir Temur”, “O‘tkan kunlar”, “Parizod”, “Oq bino oqshomlari”, “Tangalik bolalar”, “So‘g‘diyona”, “Omonat”, “Buyuk Turon” kabi filmlarda turli darajadagi rollarni ijro etgan.