Angliya futbol assotsiatsiyasi (FA) 2020-yilning fevral oyida koronavirus borasida hazil qilgan “Tottenhem” yarim himoyachisi Dele Allini bitta o‘yinga diskvalifikatsiya qildi.

24-yoshli futbolchining Snapchat’ga joylashtirgan videosi bunga sabab bo‘lgan. Xitrou aeroportida o‘tirgan Alli koronavirus haqida hazillar qilgan va bu vaqtda xitoyliklarga o‘xshash shaxsni videoga olgan. Undan keyin Dele kamerani antiseptik vositaga qaratgan holda shunday degan: “Bu virus menga yetib olishi uchun tezkorroq bo‘lishi kerak”.

FA diskvalifikatsiyadan tashqari Allini 50 ming funt miqdorida jarimaga ham tortgan va unga tarbiyaviy kurslarga borish majburiyatini yuklagan.

“FA’ning qaroriga javob sifatida shu aytmoqchiman, men bu bilan kimnidir haqorat qilgan bo‘lsam yana bir bor uzr so‘ragan bo‘lardim. Bu virus haqidagi juda yomon hazil edi, virus barchaga biz tasavvur qilganimizdanda ko‘proq ta’sir o‘tkazdi. FA mening hazilimni irqchilikka yo‘ymaganidan xursandman, chunki men irqchilikning har qanday ko‘rinishiga qarshiman”, — deydi Alli.

Shu tariqa yarim himoyachi Premyer Liga 30-turidan o‘rin olgan “Manchester Yunayted”ga qarshi kechadigan 19-iyun kungi uchrashuvni o‘tkazib yuboradi. Joriy mavsum Alli 35 o‘yinda maydonga tushib, 9 gol urdi va 6 ta golli pas amalga oshirdi.

Mavzuga doir: “Tottenhem” futbolchisi Dele Alli o‘z uyida bosqinchi o‘g‘rilar tomonidan kaltaklandi