Amerikaning 23andMe kompaniyasi tomonidan o‘tkazilgan tadqiqotda birinchi qon guruhi egalarining koronavirusga chalinish ehtimoli kamroq ekanligi aniqlandi, deb xabar bermoqda “RBK”.
Tadqiqotda 750 ming bemor ishtirok etgan bo‘lib, ularning 10 ming nafari koronavirusga chalingan. Mutaxassislar tadqiqot davomida mijozlarning jinsi, vazni va yoshini hisobga olgan holda birinchi qon guruhi bo‘lgan odamlar orasida koronavirus bilan kasallanish darajasi 9-18 foizga pastligini aniqlagan.
Qayd etilishicha, bu rezus omili musbat va manfiy bo‘lganlar uchun birday xarakterlidir. Avvalgi tadqiqotlarda faqat musbat omillar uchun xosligini ko‘rsatgan.
Avvalroq Rossiya federal tibbiy-biologik agentligi rahbari Veronika Skvorsova ikkinchi qon guruhiga mansub kishilar boshqalarga nisbatan ko‘proq koronavirus bilan kasallanayotganini ma’lum qilgandi. Ikkinchi o‘rinda I va III qon guruhlari turibdi. IV qon guruhi egalari orasida kasallanish holatlari boshqalarga qaraganda ancha kam.
Rossiya federal tibbiy-biologik agentligi rahbarining fikricha, ushbu holat qon guruhlarining tarqalish soniga bog‘liqdir. Ikkinchi guruh butun dunyoda eng ko‘p tarqalgan guruhlardan biri.
Avval Rossiyada xizmat ko‘rsatgan shifokor Vladimir Krugliy ham koronavirus bilan kasallanganlar orasida qoni ikkinchi guruhga mansub bemorlar ko‘pligini ma’lum qilgandi. U Xitoydagi kasallanish bo‘yicha ma’lumotlarga tayanib, u yerda 30 foiz bemorlarning qoni II guruhga mansubligini qayd etgan.
Mart oyida Xitoy olimlari kasallanganlarning qon guruhlari bo‘yicha tahlilini e’lon qilgan va ushbu ma’lumotlar Uxan hamda Shinjondagi bemorlar misolida taqdim etilgan. Tadqiqot natijalari bo‘yicha COVID-19’ga chalinish holatlari, asosan, ikkinchi guruh vakillarida uchragan, birinchi guruh vakillarida esa kasallanish holatlari boshqalarga nisbatan kamroq kuzatilgan.
Izoh (0)