Qashqadaryo viloyatining Yakkabog‘ tumanida yashovchi fuqaro do‘stlari bilan o‘rdak oviga chiqib, spirtli ichimlik ta’sirida pnevmatik miltiqdan 20 yoshli qizni otib qo‘ydi. Bu haqda “Daryo”ga viloyat IIB axborot xizmati xabar berdi.
Ma’lum bo‘lishicha, 2020-yil 6-iyun kuni Yakkabog‘ tumanida yashovchi fuqaro Q.S. yaqin do‘stlari bilan tumandagi “Fish breeding” fermer xo‘jaligining baliq yetishtiruvchi ko‘liga borib, u yerda o‘rdak ovlashni maqsad qilgan. Ulfatlar ov bahonasida spirtli ichimlik ham ichgan. “Gamo” rusumli pnevmatik miltiqdan ko‘ldagi o‘rdaklarni ovlashni maqsad qilgan Q.S. spirtli ichimlik ta’sirida 50 metr uzoqlikda turgan 20 yoshli qiz Ch.S.ni miltiq binokilidan kuzatmoqchi bo‘lgan va tepkini bosib yuborgan. Natijada miltiqning qo‘rg‘oshinli o‘qi fuqaro S.Ch.ning o‘ng yelkasiga borib tekkan va og‘ir tan jarohati yetkazgan.
Qashqadaryo sog‘liqni saqlash boshqarmasi axborot xizmati rahbari Nuriddin Egamovning “Daryo”ga qo‘shimcha qilishicha, o‘qdan yaralangan qizning hayoti saqlab qolingan. Respublika shoshilinch tibbiy yordam ilmiy markazi Qashqadaryo filiali shifokorlari — Olim Shomurodov, Sherbek Yaxshiboyev hamda O‘ral Shaminovlar pnevmatik miltiq o‘qidan jarohatlangan qiz hayotini asrab qolgan.
Mazkur holat yuzasidan Yakkabog‘ tuman IIB huzuridagi tergov bo‘limi tomonidan Q.S.ga nisbatan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)