“Toshkent shahrida Federal davlat budjet oliy ta’lim muassasasi Sankt-Peterburg davlat universiteti filialini tashkil etish to‘g‘risida”gi Prezident qarori loyihasi normativ huquqiy hujjatlar loyihalari muhokamasi portaliga joylashtirildi.
Hujjat loyihasiga ko‘ra, mazkur filial Toshkent davlat sharqshunoslik universitetining Toshkent shahri, Mirobod tumani, Oybek ko‘chasi, 16A-uy manzilida bo‘ladi.
Qarorda universitet ta’limning kelishilgan asosiy yo‘nalishlari (mutaxassisliklari) bo‘yicha barcha darajadagi mutaxassislarni tayyorlash, malakasini oshirish va qayta tayyorlash, shu jumladan, ilmiy-pedagogik kadrlar tayyorlash kabilarni amalga oshirishi belgilangan.
Qaror loyihasida filialda ta’limning Rossiya Federatsiyasi qonunchiligiga muvofiq, Sankt-Peterburg davlat universiteti tomonidan tasdiqlangan o‘quv reja va dasturlari asosida belgilangan ta’lim standartlariga mos ravishda rus tilida olib borilishi belgilangan.
Shuningdek, abituriyentlarni qabul qilish va filial bitiruvchilarini attestatsiyadan o‘tkazish O‘zbekiston Respublikasi Oliy va o‘rta maxsus ta’lim vazirligi bilan kelishilgan holda universitet tomonidan belgilangan talablar, tartib va muddatlarda amalga oshirilishi qayd etilgan.
Izoh (0)