O‘zbekistonda koronavirusdan tuzalganlar soni 3018 nafarga yetdi. Ular orasida Ukraina fuqarolari ham bor
Qoraqalpog‘iston Respublikasi yuqumli kasalliklar shifoxonasida 4 nafar koronavirusga chalingan bemor 4-iyun kuni sog‘aydi va reabilitatsiyaga kuzatildi, deb xabar bermoqda SSV matbuot xizmati.
Tuzalganlarning barchasi erkak bo‘lib, yoshi kattasi 43 yoshda, yoshi kichigi 25 yoshda. Hududlar kesimida olinsa Buxoro va Toshkent viloyatlaridan 1 nafardan, shuningdek, Ukraina respublikasidan 2 nafar fuqaro borligi ham aytilgan.
Qayd etilishicha, endilikda Qoraqalpog‘istonda sog‘ayganlar soni 133 nafarga yetib, hozirda davolanayotganlar 3 nafarni tashkil etmoqda. Ushbu hudud koronavirusdan xoli bo‘lishga juda yaqin turibdi.
O‘zbekistonda koronavirusdan sog‘ayganlar soni 3 014 nafarga yetgani xabar berilgan edi. Endi esa ular soni 3 018 nafarga yetdi.
Kasallanganlarning umumiy soni esa 4-iyun soat 10:00 holatiga ko‘ra, 3 874 kishini tashkil qilmoqda, bemorlarning 16 nafari koronavirus infeksiyasi asoratlari oqibatida vafot etgan.
