Xalqaro kosmik stansiya (XKS)ga ikki astronavtni yetkazishi kerak bo‘lgan Crew Dragon kemasi Falcon 9 raketasi bilan Floridadagi Kennedi Kosmik markazi maydonchasidan start oldi. Parvoz translyatsiyasi NASA’ning YouTube’dagi kanali orqali namoyish etilmoqda.
Kema ikkinchi urinishda orbitaga uchirildi — 27-may kuni bo‘lib o‘tgan birinchi urinish startga 16 daqiqa qolganida noqulay ob-havo sharoiti sabab qoldirilgan edi.
Crew Dragon bortida ikki astronavt — Duglas Xyorli va Robert Benken bor. AQSh uchun bu 2011-yildan beri o‘z kemasida amalga oshirilgan birinchi boshqariladigan kosmik parvozdir.
Liftoff! pic.twitter.com/DRBfdUM7JA
— SpaceX (@SpaceX) May 30, 2020
Bundan tashqari, bu NASA tomonidan xususiy kompaniyaga topshirilgan ilk boshqariladigan missiyadir: Dragon kapsulasi NASA bilan imzolangan shartnoma asosida SpaceX kompaniyasi tomonidan ishlab chiqilgan.
NASA va SpaceX 2014-yili Dragon yuk kemasining boshqariladigan versiyasini yaratish uchun qiymati 2,6 milliard dollarlik shartnoma imzolagan edi.
Ushbu kapsula NASA’ga odamlarni XKSga Rossiyaning “Soyuz” kemalarida yuborish ehtiyojidan qutulishi uchun kerak. 2011-yili shatllar dasturi yopilganidan beri odamlarni XKSga yuborishning hozirgacha “Soyuz”dan boshqa varianti yo‘q edi.
Izoh (0)