AQSh shaharlarida qora tanli kishining politsiya tomonidan o‘ldirilishi tufayli davom etayotgan norozilik namoyishlari sabab komendantlik soati joriy qilinmoqda

AQShdagi Denver (Kolorado shtati), Sinsinnati (Ogayo shtati), Miluoki (Viskonsin) va Portlend (Oregon shtati) shaharlarida, shuningdek, Los-Anjeles (Kaliforniya shtati), Filadelfiya (Pensilvaniya shtati) va Atlanta (Jorjiya shtati)da afroamerikalik Jorj Floydning Minneapolisda politsiyachilar tomonidan qo‘lga olinganidan keyin kuzatilgan o‘limi deb boshlangan norozilik namoyishlari tufayli komendantlik soati joriy qilindi. Bu haqda yuqoridagi shaharlarning rahbarlari rasman ma’lum qilgan.

“Biz hamma xavfsizlikda bo‘lishi tarafdorimiz. Shu sababli bugundan boshlab Denver shahrida soat 20:00 dan 05:00 ga qadar 1-iyungacha davom etadigan komendantlik soati joriy qilindi”, — deb yozgan Denver meri Maykl Xenkok Twitter’da.

Sinsinnati meri Jon Kranli esa Twitter’dagi sahifasida shanba va yakshanba kunlari uchun mahalliy vaqt bilan soat 22:00 dan 06:00 gacha amal qiladigan komendantlik soati kuchga kirishini bildirgan.

Portlend meri Tom Viler ham favqulodda holat va komendantlik soati e’lon qilgan.

“Komendantlik soati hozirdan tonggi soat 06:00 gacha amal qiladi. Ertasiga soat 20:00 dan 06:00 gacha qayta boshlanadi”, — degan u.

Milwaukee Journal Sentinel nashrining yozishicha, Miluoki meri Tom Barrett ham matbuot anjumanida tungi soat 21:00 dan komendantlik soati amal qila boshlashini ma’lum qilgan. Juma kuni tartibsizliklar oqibatida shaharda yuz bergan otishmalar sabab bir nafar politsiyachi yaralangan, 16 ta bino esa o‘marib ketilgan.

AQShdagi katta shaharlar Los-Anjeles, Filadelfiya va Atlantada ham tartibsizliklar sabab komendantlik soati joriy qilingan.

“Biz har doim so‘z erkinligi va Los-Anjeles aholisining huquqlarini himoya qilamiz, bu qo‘pollik hamda vandalizm bilan amalga oshirilmaydi. Norozilik namoyishlarida ishtirok etayotganlar, huquq-tartibot idoralari xodimlari va Los-Anjeles fuqarolarining xavfsizligini ta’minlash maqsadida saot 20:00 dan 05:00 ga qadar komendantlik soati joriy qilinadi”, — deya yozgan shahar meri Garsetti Twitter’da.

ABC telekanalining xabar berishicha, Los-Anjeles politsiyasi namoyishchilarga qarshi ko‘zni yoshlantiruvchi gaz, kuchli shovqin chiqaradigan granatalar va rezina o‘qlardan foydalangan holda qarshilik ko‘rsatmoqda.

“Filadelfiya meri shaharda soat 20:00 dan 06:00 gacha davom etadiga komendantlik soati e’lon qildi”, — deyiladi shahar politsiyasining Twitter’dagi bayonotida. Shuningdek, rasmiy axborotda ko‘chaga faqat ish yuzasidan kasb vakolati doirasida chiqishi zarur bo‘lgan fuqarolarga ushbu tartibga rioya etmaslik istisno tariqasida ruxsat beriladi.

“Kuni kecha sodir bo‘lgan tartibsizliklar sabab shahar meri Keysha Bottoms Atlanta yurisdiksiyasidagi hududlarda komendantlik soati joriy qilish haqidagi hujjatni imzoladi”, — deyilgan Atlanta administratsiyasining bayonotida.

AQShda ommaviy namoyishlar afroamerikalik Jorj Floydning Minneapolis (Minnesota shtati)da o‘ldirilishi tufayli boshlangan. Uni 25-mayda qalbaki pullardan foydalanganlikda gumon qilib hibsga olishgan. Internetda tarqalgan videoyozuvda politsiyachilardan birining gumonlanuvchini uning baqirib qarshilik ko‘rsatishiga qaramay tizzasi bilan bo‘g‘ayotgani tasvirga tushgan. Keyinchalik Floydning kasalxonada vafot etgani ma’lum bo‘lgan.