Shimoliy Koreya hukumati AQShni o‘z imijiga putur yetkazishda ayblamoqda. Pxenyanning hisoblashicha, kiberhujumlar borasidagi ayblov — KXDRni qoralashga bo‘lgan urinishdan boshqa narsa emas. Bu haqda KXDR Tashqi ishlar vazirligiga tayanib, Reuters xabar berdi.
“Yana bir marotaba qayd etamizki, AQSh gapirayotgan kiberhujumga mamlakatimizning hech qanday aloqasi yo‘q”, — deydi diplomatlar.
Vazirlik bayonotida ta’kidlanishicha, AQShning maqsadi Shimoliy Koreya obro‘siga putur yetkazish. Terrorchilikni moliyalashtirish va pul yuvish borasidagi ayblovlar ham shunga taalluqli.
Ma’lumotlarga ko‘ra, FQB va AQShning bir qator federal idoralari may oyida Shimoliy koreyalik xakerlar hujumi haqida ogohlantirish e’lon qilgan. Qayd etilishicha, xakerlar shaxsiy ma’lumotlarni o‘g‘irlash, raqamli valyutalar va yirik g‘arb banklarini o‘marish bilan shug‘ullanadi. Adliya departamenti Shimoliy Koreya davlat bankini Amerika sanksiyalarini aylanib o‘tishda ayblagan va 28 nafar KXDR fuqarosiga nisbatan jinoyat ishi ochgan.
Avvalroq Xitoy AQShni yangi sovuq urushni boshlashga undayotganlikda, yadroviy qurollar bo‘yicha Vashington Pxenyan bilan tarixiy kelishuvlarni buzishda ayblagan edi.
Izoh (0)