Xitoyda o‘tgan bir sutka ichida koronavirus bilan kasallanish bo‘yicha 7 ta hamda kasallik belgisiz o‘tayotgan 29 ta holat qayd etildi. Vafot etish holatlari qayd etilmadi, deb xabar bermoqda “RIA Novosti” Xitoy Sog‘liqni saqlash milliy komissiyasiga tayanib.
Epidemiya boshlanganidan buyon Xitoyda 82 992 kishini koronavirus bilan kasallangani qayd etilgan. Bemorlarning 78 277 nafari sog‘aygan, 4 634 nafari vafot etgan. Kasalxonalarda 81 nafar bemor davolanmoqda.
Yangi kasallanish holatlarining barchasida virus chetdan yuqtirilgan. Shuningdek, sutka davomida 29 kishi infeksiyani belgilarsiz tashuvchi sifatida qayd etilgan. Shunday kishilarning yana 403 nafari shifokorlar nazoratida bo‘lib turibdi.
Avvalroq oxirgi 10 kun davomida Xitoyning Xubey provinsiyasidagi Uxan shahri aholisini ommaviy skrining qilish natijasida COVID-19 koronavirus infeksiyasining 189 ta simptomsiz tashuvchilari aniqlangani xabar berilgandi.
Janubiy Koreyada o‘tgan bir sutkada 19 kishi koronavirusga chalinib, qayd etilgan kasallanishlarning umumiy soni 11 225 nafarga yetdi, deb xabar bermoqda “RIA Novosti” mamlakat Sog‘liqni saqlash vazirligi huzuridagi Kasalliklar nazorati va profilaktikasi markazi (KCDC) ma’lumotlariga tayanib.Yangi kasallanishlarning 16 tasi mahalliy — Xitoy hududining o‘zidan, qolgan 3 tasi esa chetdan yuqtirilgan.
Shuningdek, so‘nggi sutkada 49 kishi kasallikdan tuzalib, sog‘ayganlarning umumiy soni 10 275 nafarga yetgan. Virus qurbonlari soni esa 269 nafarga yetdi. Bir kun avval 267 kishini tashkil qilayotgandi.
Seulning odam gavjum bo‘lgan Itxevon hududidagi klub va barlarida kasallik yuqtirganlar soni 247 nafarga yetdi.
Mamlakatda chet eldan kelganlarning barchasi ikki haftalik karantinda bo‘ladi. 11-maydan boshlab esa ular qaysi mamlakatdan kelgani va kasallik alomatlari bor-yo‘qligidan qat’i nazar, majburiy koronavirus tekshiruvidan o‘tkaziladi.
Izoh (0)