Qoraqalpog‘iston Respublikasida 25-may kuni Cobalt ishtirokida yuz bergan yo‘l-transport hodisasida mashina yo‘lovchisi vafot etdi. Bu haqda YHXBB xabar bermoqda.
Hodisa soat 13:30 larda Xo‘jayli tumani hududidan o‘tgan A-380 G‘uzor–Buxoro–Nukus–Beyneu avtomobil yo‘lining 795-kilometrida yuz bergan. 1976-yilda tug‘ilgan Z.K. ismli erkak Cobalt tezligini me’yoridan oshirgan holda boshqarayotib, rul boshqaruvini yo‘qotgan. Oqibatda mashina yo‘ldan chiqib ketib, o‘ng tomondagi temir suv quvuriga borib urilgan.
YTH oqibatida yo‘lovchi 1932-yilda tug‘ilgan U.Yu. ismli ayol og‘ir tan jarohatlari olib shifoxonada vafot etgan. Haydovchi Z.K. va yana bir yo‘lovchi 1978-yilda tug‘ilgan J.G. ismli ayol tan jarohatlari bilan shifoxonaga yotqizilgan.
Mazkur YTH yuzasidan Xo‘jayli tumani IIB TB tomonidan surishtiruv ishlari olib borilmoqda.
Haydovchilar boshqaruvni yo‘qotishi oqibatida O‘zbekistonda o‘lim bilan yakunlangan YTHlar tez-tez sodir bo‘lib turadi. 22-may kuni Surxondaryodagi adirlikda traktor jarlikka ag‘darilishi oqibatida haydovchi, 17-may kuni Chiroqchida ayol haydovchi boshqaruvidagi Matiz ag‘darilib ketishi oqibatida yo‘lovchi ayol, 5-may kuni Sirdaryoda Matiz kanalga ag‘darilib ketishi oqibatida haydovchi va ikki yo‘lovchi vafot etgandi.
Izoh (0)