Axborot texnologiyalari va kommunikatsiyalarini rivojlantirish vazirining birinchi o‘rinbosari Olimjon Umarov boshqa ishga o‘tishi munosabati bilan lavozimidan ozod etildi.

Bu xabarni “Daryo”ning hukumatdagi manbalari tasdiqladi, 25-may kuni bu haqda tegishli qaror imzolangan.

Olimjon Umarov ushbu lavozimni 2017-yilning iyun oyidan beri egallab kelayotgan edi.

Tasdiqlanmagan ma’lumotlarga ko‘ra, u bosh vazir maslahatchisi – IT texnologiyalar, telekommunikatsiyalar va innovatsion faoliyatni rivojlantirish masalalari departamenti boshlig‘i lavozimini egallashi kutilmoqda.

Eslatib o‘tamiz, Vazirlar Mahkamasining yangilangan ijro etuvchi tuzilmasidagi ushbu lavozim “O‘zbekiston Respublikasi Vazirlar Mahkamasining faoliyatini takomillashtirishga oid qo‘shimcha chora-tadbirlar to‘g‘risida” Prezident qaroriga ko‘ra kiritilgandi.