O‘zbekiston xalq artisti Yulduz Usmonovaning xonadoni oldida 1-may kuni Sirdaryo viloyatining Sardoba suv omborida ro‘y bergan avariyadan jabrlanganlar uchun insonparvarlik yordami to‘planmoqda.
Yulduz Usmonovaning Instagram sahifasida insonparvarlik yordamini to‘plash jarayoni jonli efirda namoyish etilmoqda.
Toshkent shahrining turli burchaklaridan kelgan odamlar pul, ro‘zg‘or buyumlari va kiyim-kechaklar tashlab ketmoqda. Jonli efirdagi kadrlardan Yulduz Usmonova xonadonining tashqari hovlisi kiyim-kechak va turli buyumlarga to‘lib ketganini ko‘rish mumkin.
Xonandaning o‘zi pul mablag‘larini sanab olib, xayrli ishga qo‘l urganlarning har birining ismini yozib olmoqda.
Xonandaning muxlislari uning qilayotgan ishini olqishlagan. Insonparvarlik yordamini yuborishga qaror qilganlarning aksariyati xonandaning jonli efirini ko‘rganidan so‘ng uning xonadoniga oshiqqanini aytgan.
Shuningdek, Madaniyat vaziri Ozodbek Nazarbekov barcha san’atkorlarni sardobaliklarga yordam berishga chaqirgan. Ozodbek Nazarbekov 5-may kuni vazirlik tashabbusi bilan Sardoba tumani tomon insonparvarlik karvoni yo‘lga chiqishini ma’lum qilgan.
https://www.instagram.com/p/B_rgrpJHB7E/
Izoh (0)