O‘zbekiston Prezidentining qaroriga muvofiq Vohidjon Muhammadjonovich Ahmadjonov O‘zbekiston Respublikasi suv xo‘jaligi vazirining o‘rinbosari lavozimiga tayinlandi. Bu haqda Suv xo‘jaligi vazirligi xabar berdi.
Vazirlik tomonidan ma’lum qilinishicha, Vohidjon Ahmadjonov mazkur tayinlovga qadar vazirlik huzuridagi Axborot-tahlil va resurs markazi direktori lavozimida faoliyat yuritgan.
Qayd etilishicha, Prezidentning 2019-yil 25-oktabrda “Suv resurslarini boshqarish tizimini yanada takomillashtirish chora-tadbirlari to‘g‘risida”gi qaroriga asosan, vazir o‘rinbosarining zimmasiga suv xo‘jaligini innovatsion rivojlantirish, ilmiy ishlanmalar natijalarini, suv xo‘jaligini boshqarish va suv xo‘jaligi obyektlaridan foydalanishning ilg‘or usullarini amaliyotga faol joriy etish kiradi.
Shuningdek, vazir o‘rinbosari zamonaviy texnologiyalarni qo‘llagan holda suv xo‘jaligining sug‘orish tizimlarini modernizatsiya, rekonstruksiya qilish va ta’mirlashga qaratilgan kompleks chora-tadbirlarni amalga oshirish uchun ham mas’ul hisoblanadi.
Izoh (0)