May oyida bir hafta ichida uchta UFC musobaqasi bo‘lib o‘tadi

UFC prezidenti Deyna Uayt may oyining o‘rtasida bir hafta ichida uchta musobaqa o‘tkazishni reja qilayotganini ma’lum qildi. Bu haqda funksioner Instagram’dagi jonli efir vaqtida ma’lum qilgan.

Musobaqalar 9,13 va 16-may kunlari Florida shtatida (AQSh) bo‘lib o‘tadi. Avvalroq 9-may sanasida Jeksonvillda UFC 249 kechasi bo‘lib o‘tishi ma’lum qilingandi. Katta ehtimol bilan qolgan ikki musobaqa ham Floridaning eng gavjum shahridagi VyStar Veterans Memorial Arena’da kechadi.

Uaytning so‘zlariga ko‘ra, shtat Atletika qo‘mitasi musobaqalarni o‘tkazish qoidalarini ishlab chiqadi.

Deynaning ma’lum qilishicha, 9-may kungi musobaqa ESPN telekanali orqali pay-per-view (tomosha uchun pul to‘lash) tizimida efirga uzatiladi. Qolgan ikki musobaqa translyatsiyasi qanday bo‘lishi telekanal ixtiyorida qoladi.

Eslatib o‘tamiz, UFC 249 musobaqasining asosiy jangi yengil vazn toifasi vaqtinchalik chempioni Toni Fergyuson va Jastin Getji o‘rtasida kechadi.