Buxoro hokimi o‘rinbosari Jamol Nosirov madaniyat vaziri Ozodbek Nazarbekovga birinchi o‘rinbosar bo‘ldi. Bu haqda “Daryo” muxbiri xabar bermoqda.
Ta’kidlanishicha, viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida faoliyat yuritib kelgan Jamol Nosirov Prezidentning 2020-yil 22-apreldagi qaroriga asosan, Madaniyat vazirining birinchi o‘rinbosari etib tayinlangan.
Jamol Nosirov 2012—2014-yillarda Yoshlar Ittifoqi (sobiq “Kamolot” YoIH) viloyat kengashi raisi lavozimida ishlagan. Shu davr mobaynida yoshlar tashkiloti muassisligidagi “Buxoro yoshlari” gazetasida bosh muharrirlik ham qilgan.
2015-yil Oliy Majlis Qonunchilik palatasiga deputat etib saylangan. 2017-yilda esa Buxoro viloyati hokimiga o‘rinbosar etib tayinlangan.
“Daryo” muxbirining qo‘shimcha qilishicha, Jamol Nosirov o‘rniga viloyat hokimining mahalla va oila masalalari bo‘yicha o‘rinbosari lavozimida ishlab kelgan Yo‘ldosh Jumayev tayinlanishi kutilmoqda.