Afg‘onistonning shimolida joylashgan Badaxshon viloyati rasmiylari IShID va “Al-Qoida” hamda ular bilan bog‘liq guruhlar mintaqada harbiy harakatlarni kuchaytirishga urinayotganini ma’lum qildi. Bu haqda TOLONews xabar berdi.
Mahalliy rasmiylarning aytishicha, taxminan 400 nafar jangari — IShID, Tojikistonning harbiylashgan “Ansarulloh” guruhi, Sharqiy Turkiston islom harakati, O‘zbekiston islomiy harakati va uyg‘urlik jihodchilar kabi turli terrorchilik guruhlari bilan bog‘liq. Mazkur jangarilar viloyatning turli qismlarida harakat qiladi, asosan Juram uyezdidagi Xastak vodiysida faol hisoblanadi.
Badaxshon Xitoy bilan 100 kilometr, Pokiston bilan 450 kilometr, Tojikiston bilan 800 kilometrdan ortiq masofada chegaradosh hisoblanadi. Biroq harbiylarning so‘zlariga ko‘ra, Pokiston bilan chegaradosh bo‘lgan Xastak vodiysi strategik hudud sifatida mamlakat shimoli va shimoli-sharqida mahalliy va xorijiy jangarilar uchun muhim hisoblanadi.
“Ular katta kuch bilan harakat qilish uchun o‘zlarining uchinchi bazasini Badaxshonda mustahkamlashni istamoqda”, — deya ma’lum qilgan Badaxshon viloyati gubernatori Zakariya Savdo. Gubernator bu holatni Afg‘onistondagi va Yaqin Sharqdagi tinchlik jarayonlari uchun katta xavf deb hisoblamoqda.
Badaxshon viloyati kengashi rahbari Javed Mojajiddiyning aytishicha, jangarilar Varduj, Yamgan uyezdlarida va Xastak vodiysida urush boshlamoqchi. Xalqaro terrorchilar Badaxshondagi urushga rahbarlik qilishni boshlagan.
Pomir armiya korpusi batalyoni qo‘mondoni Lotufulla Alizayning ma’lum qilishicha, mazkur hududda 600 nafardan ortiq mahalliy va xalqaro terrorchi mavjud. Badaxshon politsiyasi rahbari Asadullo Muhammadiy hududni terrorchilardan tozalash uchun aviatsiyadan ko‘mak so‘ragan.
Alizayning qayd etishicha, terrorchilar ochiq chegaralar orqali xorijga oltin eksport qilishdan yaxshi daromad oladi. IShID va “Al-Qoida”ni qo‘llab-quvvatlovchi 600 nafar terrorchidan tashqari, Badaxshonning 22 ta tumanida “Tolibon” harakatining 2000 nafar a’zosi hukumatga qarshilik ko‘rsatmoqda.
Joriy yilning 29-fevral kuni Qatar poytaxti Doha shaharida AQSh va “Tolibon” o‘rtasida tinchlik bitimi imzolandi. Uning shartlariga ko‘ra, “Tolibon” boshqa terrorchilik guruhlari bilan har qanday hamkorlikdan bosh tortishi kerak, shuningdek, o‘zining besh ming nafar tarafdori ozod qilinishi evaziga ming kishini ozod qilishi kerak.
Rasmiy Kobul 9-aprel kuni “Tolibon”ning asirga olingan 100 nafar a’zosini qo‘yib yuborgan. 10 kundan keyin “Tolibon” afg‘onistonlik harbiylarning jami 60 kishidan iborat uchta guruhi qo‘yib yuborilganini ma’lum qilgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)