AQSh prezidenti Donald Tramp koronavirus pandemiyasi tufayli deyarli bir oydan buyon Oq uyni tark etmayapti. Bu haqda u jurnalistlarga onlayn brifing paytida ma’lum qilgan.
“Menga safarlardan tiyilib turishni tavsiya etishdi. Bir oy davomida Oq uyda bo‘ldim”, — degan Tramp va faqat bir marta Nyu-Yorkka yo‘l olgan harbiy-tibbiy kemani kuzatishga borib kelganini qo‘shimcha qilgan.
Jons Hopkins universiteti ma’lumotlariga ko‘ra, butun dunyoda koronavirus oqibatida vafot etganlar soni 150 ming kishidan oshib ketdi. COVID-19 qurbonlari va kasallanganlar soni bo‘yicha AQSh dunyoda birinchi o‘rinda ketmoqda. Mamlakatda 700 mingdan ortiq kishi koronavirus yuqtirgan, 37 mingdan ortig‘i vafot etgan.
Avvalroq Tramp AQShda koronavirus qurbonlari qanchaga yetishi mumkinligi to‘g‘risidagi prognoziga o‘zgartirish kiritgani, koronavirus sabab joriy etilgan cheklovlarni bosqichma-bosqich bekor qilish rejasi bilan bo‘lishgani haqida xabar berilgan edi.
Izoh (0)