Zelenskiy Ukrainaning “omon qolish” rejimiga o‘tishini e’lon qildi

Ukraina prezidenti Vladimir Zelenskiy “Savik Shusterning so‘z erkinligi” tok-shousida ukrainaliklarni karantin davrida “omon qolish” uchun tayyorgarlik ko‘rishga chaqirdi, deb xabar beradi “Dialog.ua”.

Nashrning ta’kidlashicha, Ukraina prezidenti chiqishining asosiy qismi karantin vaqtidagi iqtisodiy choralarga bag‘ishlangan. “Afsuski, pul chop etadigan printerimiz yo‘q”, — degan Zelenskiy. Uning so‘zlariga ko‘ra, hozirda davlatning bor kuchi ukrainaliklarning karantin davrida omon qolishi uchun yo‘naltirilgan.

“Ochiqchasiga aytaman, hozirda bizning vazifamiz — qulaylik yaratish emas, omon qolish. Non, yog‘, sut, un bo‘lsa omon qolamiz. Koronavirusdan o‘tib o‘lsak, 1-1,5 oyda yana yo‘lga tushib olamiz”, — deydi Zelenskiy.

Ukraina prezidentining qayd etishicha, birinchi navbatda aholining iqtisodiy jihatdan eng zaif qatlami — nafaqaxo‘rlar qo‘llab-quvvatlanadi. Ular uchun bir qator dasturlar ishlab chiqilgan, xususan, 1000 grivnadan (37 dollar) to‘lash, 80 yoshdan kattalar uchun yana qo‘shimcha 500 grivna berish, pensiyalar indeksatsiyasi va hokazo.

Shuningdek, Zelenskiy o‘rta va kichik biznesni, ishsizlarni qo‘llab-quvvatlashga ham va’da bergan.

Zelenskiyning yana bir bor ta’kidlashicha, Ukrainada Xalqaro valyuta fondi (XVJ) kreditlarisiz defolt yuz berishi natijasida og‘ir iqtisodiy oqibatlar yuzaga kelishi mumkin. “Xalqaro valyuta jamg‘arasining yordami bor ekan, nega defolt bilan tavakkal qilishimiz kerak? Boshqa vaqt bo‘lganida o‘ylab ko‘rardik: foydalimi yoki yo‘q, biroq hozir bu organizm uchun qondek zarur”, — deydi prezident.

Zelenskiyning so‘zlariga ko‘ra, Ukrainaga XVJdan tashqari Germaniya, Ozarbayjon, BAA va AQSh pul berishga tayyor. Biroq ular XVJning signalisiz qadam tashlashga jazm etmaydi.