O‘zbekistonda 2020-yil davomida takroriy hamda tomorqa xo‘jaliklarida 2,9 million tonnaga yaqin kartoshka yetishtirish rejalashtirilgan. Bu haqda 17-aprel kuni kuni AOKAda bo‘lib o‘tgan brifingda Qishloq xo‘jaligi vaziri o‘rinbosari Saidkamol Xo‘jayev ma’lum qildi.
Vazir o‘rinbosarining ta’kidlashicha, kartoshkaning ichki iste’moli asosan zaxira va chet eldan import qilish hisobiga qondiriladi.
Mamlakatda kartoshka taqchilligi (45—50 ming tonna oyiga) asosan mart-aprel oylariga to‘g‘ri keladi. 2019-2020-yillar qish-bahor mavsumi uchun 181 ming tonna kartoshka zahira qilingan.Shuningdek, 2020-yil yanvar-mart oylarida xorijiy mamlakatlardan 130 ming tonna kartoshka mahsuloti kirib keldi, jumladan, mart oyining o‘zida 60 ming tonnadan oshdi. Aprel oyida ham iste’molning bir qismini import hisobidan qoplanadi.
Mart oyi oxirgi o‘n kunligidan boshlab respublikamizning janubiy viloyatlaridan ichki bozorlarimizga ertaki kartoshka mahsulotlari chiqarila boshlandi. Jumladan, aprel oyida 65 ming tonnaga yaqin, may oyida esa 85 ming tonna kartoshka yetishtiriladi.
Shuningdek, kartoshkachilikni rivojlantirish, hududlarni ixtisoslashtirish, sohani qo‘llab-quvvatlash tizimlarini yaratish maqsadida maxsus qaror loyihasi ishlab chiqildi va ushbu qaror loyihasi tegishli vazirlik va idoralar bilan kelishilmoqda.
2020-yilda respublika bo‘yicha asosiy va g‘alladan bo‘shaydigan takroriy hamda tomorqa xo‘jaliklarida jami 130 ming gektar maydonda 2,9 million tonnaga yaqin kartoshka ishlab chiqarish prognoz ko‘rsatkichlari belgilab olindi. Yil davomida ichki iste’molni to‘liq qoplashga yetadi.
Saidkamol Xo‘jayev, Qishloq xo‘jaligi vaziri o‘rinbosari
Mavzuga doir:
- O‘zbekistonda tomorqa yerlardan unumli foydalanmagan fuqarolar jarimaga tortiladi
- O‘zbekistonda qishloq xo‘jaligi kooperativiga a’zo bo‘lgan ishsiz fuqarolarga Bandlik va mehnat munosabatlari vazirligi jamg‘armasi tomonidan 24 mlrd so‘m ajratiladi
- Mahalla vaziri Rahmat Mamatov: Bundan keyin hokim yer ajratishda mahalla bilan kelishishi kerak
Izoh (0)