Angliyaning Blekpul shahrida yashovchi to‘qqiz yoshli qizcha kam uchraydigan kasallikdan aziyat chekuvchi onasini oltinchi marta o‘limdan saqlab qoldi, deb yozadi The Mirror.
37 yoshli Jemma Hamnett kam uchraydigan Addison kasalligiga chalingan. U tez-tez hushidan ketadi.
Bu endokrin kasallik bo‘lib, buyrakusti bezlari yetarli miqdorda gormonlar, birinchi navbatda, organizm metabolizm va stressga qarshi ishlatadigan kortizol va aldosteronni ishlab chiqara olmaydi.
Jemma Addison kasalligi bilan yetti yoshidan beri aziyat chekadi, biroq unga 2010-yilda tashxis qo‘yilgan.
U Lankashir politsiyasida 11 yil ishlagan. 2009-yilga kelib esa sog‘lig‘i to‘g‘ri kelmagani uchun bo‘shagan.
Kasallik arzimagan sabablar, xususan, oyoq barmog‘ini qayerinidir urib olish yoki yomon xabar eshitish tufayli ham qo‘zg‘ashi mumkin.
Jemma hushini yo‘qotganida unga sakkiz daqiqa ichida tarkibida steroidlar bo‘lgan ukol qilish kerak, bo‘lmasa, u o‘lishi mumkin. Ukol organizmga o‘zi ishlab chiqara olmagan gormonlarni ishlab chiqarishga yordam beradi.
Jemmaning qizi Siyenna Hamnett-Chau onasini ilk marta to‘rt yoshli paytida o‘limdan saqlab qolgan.
O‘shandan beri u onasiga olti marta tibbiy yordam ko‘rsatdi.
Oxirgi marta Jemmada izolyatsiya tufayli vahima boshlandi va u hushdan ketdi.
9 yoshli Siyenna bosiqlik bilan onasiga steroidli ukolni qo‘ydi.
“U kolbadan insulinni olishi va hushdan ketganimda menga ukol qilishi kerak. U tez yordamga qo‘ng‘iroq qiladi. Biroq kasalligim kam uchragani uchun shifokorlar uyimizga kelgunicha kasalligimni o‘rganishi kerak”, — deydi Jemma.
Oxirgi voqeadan so‘ng Jemmaning sobiq hamkasblari — politsiyachilar uni ko‘rgani keldi. Siyennaning bu vaziyatda o‘zini qanday tutgani ularni ta’sirlantirdi.
Mahalliy politsiya vakili Kler Sloan qizcha medalga munosib ekanligini aytdi.
“U mehribon, g‘amxo‘r qiz. Uning o‘zi naqadar hayratlanarli ekanligini bilmaydi”, — deydi Sloan.
Izoh (0)