O‘zbekiston va Buyuk Britaniya tibbiyot xodimlari 13-aprel, dushanba kuni, koronavirusga qarshi kurashish masalalarini muhokama qildi, deb xabar bermoqda TIV matbuot xizmati.
Qayd etilishicha, videokonferensiya tarzida tashkil etilgan ushbu muhokamada ikki davlat mutaxassislari koronavirusga qarshi kurashish borasida qo‘llanilayotgan choralar, tashxis qo‘yish va kasallarni davolash bo‘yicha tibbiyot muassasalarining faoliyati to‘g‘risida batafsil axborot almashdi.
Britaniyalik mutaxassislarda o‘zbekistonlik hamkasblarining bemorlarni kasallikdan tuzalgan kishilarning qon plazmasi orqali davolash bo‘yicha ilmiy tadqiqotlari va mamlakat shifoxonalarida ushbu uslubni keng joriy qilish borasidagi rejalari katta qiziqish uyg‘otdi.
Tomonlar kelgusida ham aloqada bo‘lish va doimiy asosda shu kabi tadbirlarni o‘tkazib turishga kelishdi.
Eslatib o‘tamiz, O‘zbekistondagi bir qator tajribali olim va shifokorlar bilan kelishilgan holda tez kunlarda mutlaqo yangicha usul — koronavirusdan sog‘aygan insonlarning qon zardobini xastaligi og‘ir kechayotgan bemorlarga quyish amaliyotini joriy etish boshlanishi xabar berilgan edi.
Ayni paytda O‘zbekistonda koronavirusga chalinganlar soni 1113 kishiga yetdi, bemorlarning 99 nafari tuzaldi. Dunyo bo‘yicha esa kasallanganlar soni 1 million 934 ming kishidan oshdi.
Izoh (0)