Sirdaryo viloyati Mirzaobod tumanida baliqchilik xo‘jaligi ish yurituvchisi elektr energiyasidan noqonununiy foydalangani sababli davlatga yetkazilgan zararni to‘ladi. Bu haqda “Daryo”ga Majburiy ijro byurosi ma’lum qildi.
Xabar berilishicha, MIBning Mirzaobod tuman bo‘limi xodimlari tomonidan “Haqiqat” MFY hududida joylashgan baliqchilik fermer xo‘jaligi ish yurituvchisi Z.Y.ning elektr energiyasidan foydalanish holati tekshirilgan.
Tekshiruvda aniqlanishicha, Z.Y. tashqi ta’sir ko‘rsatish orqali hisoblagichni sun’iy ravishda to‘xtatgan hamda uch dona har birining quvvati 55 kilovatt bo‘lgan, suv tortishga mo‘ljallangan dvigatellardan noqonuniy foydalanib kelgan. Mazkur holat yuzasidan baliqchilik fermer xo‘jaligi ish yurituvchisi Z.Y.ga nisbatan tegishli hujjatlar rasmiylashtirilgan.
Tuman elektr tarmoqlari korxonasining qayta hisob-kitob dalolatnomasiga ko‘ra, ish yurituvchisi Z.Y. tomonidan elektr tarmoqlari korxonasi manfaatlariga 120 million so‘m miqdorida zarar yetkazilganligi aniqlangan.
Ko‘rilgan chora-tadbirlar natijasida ish yurituvchi Z.Y. tomonidan 120 million so‘m pul mablag‘i bank kassasiga naqd pul shaklda to‘langan. Shuningdek, baliqchilik fermer xo‘jaligining elektr energiyasi iste’moli uchun 35, 5 million so‘m miqdorida qarzdorligi mavjudligi aniqlangan hamda yetkazilgan zararga qo‘shilgan. Baliqchilik fermer xo‘jaligi tomonidan elektr ta’minot korxonasiga yetkazilgan jami 155, 5 million so‘mlik moddiy zarar to‘liq undirilishi ta’minlangan.
Qayd etilishicha, Z.Y. yetkazilgan moddiy zararning o‘rnini belgilangan muddatda ixtiyoriy ravishda to‘liq qoplaganligi, aybiga to‘liq iqrorligi, muqaddam sudlanmaganligi, birinchi marta jinoyat sodir etganligi, qilgan ishidan pushaymonligi sababli javobgarlikdan ozod etilgan.
Avvalroq Majburiy ijro byurosi “Ohangaronshifer”ning 146 nafar xodimiga 388 million so‘mlik ish haqini undirib bergani haqida xabar berilgan edi.
Izoh (0)