Qashqadaryo viloyatida 13-aprel kuni koronavirus infeksiyasiga chalingan 2 nafar bemor butunlay sog‘ayib, reabilitatsiyaga kuzatildi. Viloyat sog‘liqni saqlash boshqarmasi axborot xizmati rahbari Nuriddin Egamov 8 yoshli farzandi sog‘aygan chiroqchilik ayol bilan suhbatlashdi.
“Ona uchun bolalarining sog‘lig‘idan, oilasining tinchligidan ortiq baxt bormi, — deydi farzandi koronavirusdan sog‘aygan chiroqchilik ayol T.O. — Birdaniga turmush o‘rtog‘i, to‘rt nafar farzandi shunday dardga chalingan mendek ayolning ahvoli hech kimning boshiga tushmasin”. T.O.ning turmush o‘rtog‘i va 4 nafar farzandida koronavirus kasalligi aniqlangan. O‘zi esa 13-aprel kuni 14 kunlik karantin muddatini tugatib, uyiga qaytdi.
“Shifoxonada barcha shart-sharoitlar yaratib berildi. Vrachlar va hamshiralar xuddi o‘z yaqinlarimizday g‘amxo‘rlik qilishdi. Prezidentga, hukumatga, shifokor-u hamshiralarga, bolamning sog‘ayishi uchun hissa qo‘shgan, oilamning qolgan a’zolari salomatligini tiklash uchun jon kuydirayotgan barcha-barchaga boshim yerga tekkunicha ta’zim qilib, chin qalbimdan rahmat aytaman. Ilohim, Alloh barcha bemorlarning dardiga shifo bersin. Menday onalarning, jami elimizning duolari ijobat bo‘lsin”, — deydi T.O.
Eslatib o‘tamiz, koronavirusdan sog‘aygan qashqadaryolik bemorlarning har ikkisi ham Chiroqchi tumanidan bo‘lib, biri 56, ikkinchisi esa 8 yoshli bemor bo‘lgan. Qolgan 4 nafar bemorning ahvoli qoniqarli darajada.
“Bu quvonchli voqea voha tibbiyot xodimlarining, jumladan, viloyat yuqumli kasalliklar shifoxonasi jamoasining ulkan yutug‘i bo‘ldi. Bu muvaffaqiyatda, ayniqsa, bemorlarimiz boshlari uzra kun-u tun parvona bo‘lgan mutaxassislar, sanitar xodimlarimizning mashaqqatli va jasoratli mehnatlari mujassam ekanligini alohida ta’kidlashimiz kerak”, — deydi shifoxona bosh shifokori Hamza Ernazarov.
Qo‘shimcha qilinishicha, ayni paytda viloyatda 199 nafar fuqaro statsionar, 4811 nafar fuqaro uy sharoitida karantinda saqlanmoqda.
Avvalroq koronavirusga chalingan chiroqchilik 14 yoshli bemorning 158 nafar qishloqdoshi karantindan uyiga qaytgani xabar qilingandi.
Izoh (0)