O‘zbekiston Prezidenti Shavkat Mirziyoyev 9-aprel kuni Tojikiston Prezidenti Emomali Rahmon bilan telefon orqali muloqot qildi. Bu haqda Prezident matbuot xizmati xabar berdi.
Ma’lum qilinishicha, davlat rahbarlari mamlakatlar va Markaziy Osiyo mintaqasidagi koronavirus tarqalishi bilan bog‘liq joriy epidemiologik vaziyat yuzasidan fikr almashdi.
Koronavirusga qarshi samarali kurashish maqsadida muvofiqlashgan choralarni ishlab chiqish, o‘zaro ko‘maklashish, tegishli tibbiyot va boshqa aloqador xizmatlar o‘rtasidagi yaqin muloqotlarni davom ettirish muhimligi qayd etildi.
Pandemiyaning ikki tomonlama yaxshi qo‘shnichilik va strategik sheriklik munosabatlarining rivojlanish sur’atiga salbiy ta’sirini kamaytirish uchun oldindan chora ko‘rish lozimligi alohida ta’kidlandi. Savdo-iqtisodiy, investitsiya, moliya va transport-kommunikatsiya sohalari, shuningdek, hududlararo hamkorlik, shu jumladan poytaxt shaharlar Toshkent va Dushanbe o‘rtasidagi almashinuvlar doirasida amalga oshirilayotgan loyihalar bu boradagi ustuvor yo‘nalishlar sifatida belgilab olindi.
Suhbatda O‘zbekiston va Tojikiston Prezidentlari mintaqaviy hamkorlikka oid va xalqaro ahamiyatga molik ayrim dolzarb masalalarni ham ko‘rib chiqdi.
Avvalroq O‘zbekiston Tojikistonga un va antiseptiklardan iborat 18 vagon gumanitar yordam yuborgani haqida xabar berilgan edi.
Eslatib o‘tamiz, Shavkat Mirziyoyev va Emomali Rahmon 3-aprel kuni ham telefon orqali koronavirusga qarshi kurashda hamkorlik masalasini muhokama qilgan edi. Bundan tashqari, shu paytgacha Shavkat Mirziyoyev koronavirusga qarshi kurash masalasida Qozog‘iston, Qirg‘iziston, Turkmaniston va Afg‘oniston prezidentlari bilan telefon orqali muloqot qilgan.
Ma’lumot uchun, O‘zbekistonda koronavirusga chalinganlar soni 582 nafarga yetgan, ulardan 38 nafari tuzalgan bo‘lsa, 3 nafari hayotdan ko‘z yumgan. Tojikistonda esa hozircha koronavirus bilan bog‘liq bironta ham holat qayd etilmagan.
Izoh (0)