O‘zbekiston Prezidenti Shavkat Mirziyoyev 8-aprel, chorshanba kuni, koronavirus pandemiyasiga qarshi kurashishda joylardagi ishlar natijadorligi yuzasidan o‘tkazilgan videoselektor yig‘ilishida koronavirusdan vafot etgan 40 yoshli bemorning oila a’zolariga hamdardlik bildirdi.
“Mana shunday og‘ir sinov damlarida ko‘pmillatli xalqimiz sarosima va vahimaga tushmasdan, aksincha, chetdan kelgan bu baloning tezroq o‘tib ketishiga, hademay yaxshi kunlar kelishiga ishonib, o‘zining mustahkam irodasi, mehr-oqibati va hamjihatligini yana bir bor namoyon etmoqda”, — dedi Shavkat Mirziyoyev.
Misli ko‘rilmagan darajada targ‘ibot ishlariga qaramay uyida davolangan va og‘ir holatda yotqizilgan 40 yashar bemor kecha olamdan o‘tdi, deyiladi Prezident matbuot xizmati xabarida.
Marhumning oila a’zolariga hamdardlik bildirar ekan, davlat rahbari yana bir bor barchani ogohlikka chaqirdi. “Kasallik alomatini sezdingizmi, darhol shifokorlarga murojaat qiling. Takror aytaman, kasallikning oilamizga kirib kelmasligi, o‘zimiz va yaqinlarimizni ushbu illatdan saqlab qolish, eng avvalo, o‘zimizga bog‘liq!”, — dedi Prezident.
Ma’lum qilinishicha, o‘tgan davrda karantin qoidalarining 47 mingga yaqin buzilish holati, shu jumladan, 34 ming marta niqob taqmaslik, 11 ming marta avtotransportda karantinga rioya qilmaslik holati aniqlanib, jarimalar qo‘llangan. Hattoki, 24 ta holatda yuzlab odamlarni to‘plab, ziyofat va marosimlar o‘tkazilgani aniqlangan.
“Butun dunyoning boshiga tushgan bu murakkab sinovdan biz, Xudo xohlasa, yanada kuchli bo‘lib, bir-birimizga mehrimiz yanada ziyoda bo‘lib, albatta, yorug‘ yuz bilan o‘tib olamiz. Faqat tartib-intizomga qat’iy rioya qilib, o‘rinsiz vahimaga tushmasak, tushkunlikka berilmasak, marra bizniki bo‘ladi.
Bu vaqtinchalik qiyinchilik va muammolar, albatta, o‘tib ketadi. Pok niyatli, din-u diyonatli, sabr-bardoshli, olijanob xalqimiz bilan hali ko‘p yaxshi kunlarni ko‘ramiz, ko‘p to‘y-tomosha va tantanalarni birgalikda nishonlaymiz, oldimizga qo‘ygan maqsadlarimizga, albatta, yetamiz,” — dedi Prezident Shavkat Mirziyoyev.
Eslatib o‘tamiz, O‘zbekistondagi koronavirusning 3-qurboni, Chirchiq shahrida yashovchi fuqaro Sh. 30-mart kuni og‘ir ahvolda viloyat yuqumli kasalliklar shifoxonasiga yotqizilgan. 31-mart kuni esa Toshkent shahridagi Epidemiologiya, mikrobiologiya va yuqumli kasalliklar ilmiy tekshirish instituti klinikasiga o‘tkazilgan. 7-aprel oqshomida bemorning ahvoli keskin yomonlashgan. Yetakchi shifokorlar tomonidan berilgan tavsiyalar to‘liq bajarilganiga qaramay, bemor Sh.da yurak va o‘pka yetishmovchiligi sabab yurak faoliyati to‘xtashi kuzatilgan.
Shavkat Mirziyoyev 3-aprel kuni bo‘lib o‘tgan videoselektor yig‘ilishida Chirchiqda aniqlangan koronavirusga chalinish holati haqida gapirgan edi.
“Kechqurun Chirchiqdan og‘ir ahvoldagi bemorni olib kelishdi. Bilasizlarmi, besh-olti kun juda yuqori harorat bilan uyida yotgan. Holbuki, oynai jahonda 24 soat davomida odamlarimizga ogoh bo‘laylik, madaniyatli bo‘laylik, o‘zimizga, bola-chaqamizga e’tiborli bo‘laylik deyapmiz. Yo‘q. Besh-olti kun yotgan, oilasi bor, farzandi bor, nabirasi bor, uyida yotgan. Doktor chaqirsa bo‘lmaydimi?”, — degandi o‘shanda Prezident.
Ma’lumot uchun, O‘zbekistonda koronavirusga chalingan bemorlar soni 545 nafarga yetdi. Shu vaqtgacha ularning 30 nafari sog‘aygan, 3 nafari vafot etgan. Xorijda esa kamida 23 o‘zbekistonlikda koronavirus aniqlangan, ularning uch nafari vafot etgan.
Izoh (0)