Oziq-ovqat mahsulotlari xavfsizligi bo‘yicha ekspert Xemme del Kanyo va shef-oshpaz Jordi Vila tovuq mazali chiqishi uchun uni qanday pishirish kerakligi haqida so‘zlab berdi, deb yozadi “News.ru”.
Qayd etilishicha, buning uchun aksariyat ayollar yo‘l qo‘yadigan xatolarni chetlab o‘tish kifoya. Ekspertlarning fikricha, ko‘pchilik ayollar tovuqning muzini noto‘g‘ri eritadi. Tovuqni tayyorlashdan bir kun avval uni muzlatgich muzxonasidan chiqarib qo‘yish kerak yoki muzini eritishda mikroto‘lqinli pechdan foydalanish kerak.
Mikroto‘lqinli pechda tovuqni eritayotganda uni aylantirib turish kerak. Shuningdek, tovuqni tayyorlashdan avval uni kran suvida yuvish tavsiya etilmaydi.
Oshpazlarning fikricha, tovuqning suyakli qismi mazali hisoblanadi. Ushbu qoida go‘shtning boshqa turlariga ham taalluqli. Tovuq terisi o‘ta yog‘li bo‘lmasagina ovqatga yoqimli ta’m baxsh etadi. Shu bilan birga tovuqning bu qismi bakteriyalar bilan juda yaqin bo‘lishini ham unutmaslik zarur.
Tovuq pishirayotganda ziravorlarni uni tayyorlash jarayonida qo‘shish kerak. Shunda ular go‘shtga yaxshi singadi. Ko‘pchilik tovuq tayyor bo‘lishiga yaqin ziravorlarni sepadi, bu noto‘g‘ri.
Mutaxassislarning ta’kidlashicha, tovuqning turli qismini turlicha usulda pishirish kerak. Tovuqning ko‘krak qismidagi go‘shtini grillda pishirish tavsiya etiladi. Go‘shtni yupqa bo‘laklarga bo‘lib, balandroq olovda pishirish kerak.
Tovuq go‘shtini hadeb aralashtiraverish ham yaramaydi. Bir tomoni yaxshilab qovurilgach, uni ag‘darish mumkin.
Agar tovuqni duxovkada pishirmoqchi bo‘lsangiz, uning ko‘krak qismini pastga qaratib qo‘ying. Shunda uning suvi butun tanasiga oqib, go‘shtni mazali qiladi. Tovuq tayyor bo‘lishiga 10 daqiqa qolganida uni o‘giring. Shunda tovuqning hamma joyi birdek qip-qizil chiqadi.
Izoh (0)