Zimbabve va Madagaskarda koronavirus bilan kasallanishning ilk holatlari qayd etildi

Zimbabveda koronavirus bilan kasallanish bo‘yicha ilk holat qayd etildi. Bu haqda mamlakat sog‘liqni saqlash vaziri Obadiya Moyoga tayanib “RIA Novosti” xabar berdi.

Moyoning so‘zlariga ko‘ra, bemor Zimbabve g‘arbidagi Viktoriya-Fols shahrida yashovchi chet ellik erkak. U bir muddat avval Buyuk Britaniyadan qaytib kelgan va o‘zini o‘zi izolyatsiyalagan. Hozirda bemor kimlar bilan muloqotda bo‘lganini aniqlamoqda.

Shuningdek, Madagaskarda ham koronavirus bilan kasallanish bo‘yicha ilk bemorlar ro‘yxatga olingan. Gap Madagaskarga 17-mart kuni Fransiyadan uchib kelgan 41 yoshli ayol, 18-mart kuni Fransiyadan tranzit reys bilan kelgan 19 yoshli qiz hamda Fransiyadan kelgan yana bir ayol haqida ketmoqda. Ularning barchasi karantinga joylashtirilgan va zarur davolash ishlari olib borilmoqda.

So‘nggi ma’lumotlarga ko‘ra, O‘zbekistonda koronavirus infeksiyasini yuqtirib olganlar soni 37 nafarga yetgan. O‘zbekistonda 21-martdan mamlakatdagi choyxona va oshxonalar yopiladi, 23-martdan to‘ylarning o‘tkazilishi bekor qilinadi.