Inson huquqlari bo‘yicha O‘zbekiston Milliy markazi ijtimoiy tarmoqlarda COVID-19 virusi bilan bog‘liq shaxsiy ma’lumotlarni tarqatmaslikka chaqirdi.
Markaz matbuot xizmatining ma’lum qilishicha, hozirgi paytda ijtimoiy tarmoqlarda koronovirus infeksiyasini yuqtirgan bemorlarning shaxsiy ma’lumotlarini tarqatish holatlari uchramoqda.
Shu sababli markaz “Fuqarolar sog‘lig‘ini saqlash to‘g‘risida”gi qonunning 24-moddasida bemor tibbiy yordam so‘rab murojaat qilgan va tibbiy yordam olayotgan paytda tibbiy yordam so‘rab murojaat qilganligi, sog‘lig‘ining holati, qo‘yilgan tashxis to‘g‘risidagi ma’lumotlar hamda uni tekshirish va davolash chog‘ida olingan boshqa ma’lumotlar sir saqlanishi huquqiga egaligi belilab qo‘yilganini eslatib o‘tgan.
Inson huquqlari bo‘yicha O‘zbekiston Milliy markazi, shuningdek, Jahon sog‘liqni saqlash tashkilotining odamlarning bir-birlariga g‘amxo‘rlik qilish, hamdardlik bildirish, do‘stlar va qarindoshlar bilan muloqot qilish, har kuni pandemiya bilan kurashayotgan tibbiyot xodimlari haqida unutmaslik, kasallangan odamlarga “koronavirus qurbonlari” kabi tamg‘alarni qo‘ymaslik va qo‘llab-quvvatlash va hamdardlikka loyiq bemorlarga insoniylik ko‘rsatish chaqiriqlariga e’tibor qaratdi.
“COVID-19 virusi jamiyatimiz bardoshi uchun sinovdir”, — deyiladi markaz bayonotida.
Prezident xavfsizlik xizmati rahbarining o‘rinbosari Otabek Umarov o‘zining Telegram’dagi sahifasida koronavirusga chalingan O‘zbekiston fuqarolarining shaxsiy ma’lumotlarini e’lon qilgan kishilar topilgani, ularning shaxslari huquqni muhofaza qilish idoralari tomonidan aniqlanganini ma’lum qilgandi. IIV ma’lumotlariga qaraganda, hozirda ularning xatti-harakatlariga huquqiy baho berilmoqda.
Shuningdek, IIV O‘zbekistonda koronavirus haqida haqiqiy vaziyatni soxtalashtirib talqin qilayotgan 33 ta akkaunt aniqlangani xabar berilgandi.
Izoh (0)